Pedri, Francisco Trincao, Sergino Dest, Riqui Puig, Ronald Araujo… nan no ta nomber asina comun ainda den futbol profesional, pero algun di e hobennan aki lo hunga un papel prominente diadomingo venidero den e ‘Clasico’ entre Barça y Real Madrid.

Despues di un clausura fatal di temporada pasa, e coach nobo di Barcelona Ronald Koeman ta tratando di yega na renoba su team cu un lote nobo di talente hoben cu e fin di siman aki lo trata di establece un nomber pa nan mes den un di e scenarionan mas codicia den futbol Europeo.

Demasiado bieu, demasiado lento… esey tabata e veredicto di e seleccion anterior di Barcelona, cu a haya e sota historico contra Bayern (2-8) den Champions League na augustus pasa. Varios hungador a bay: Luis Suarez, Ivan Rakitic y Arturo Vidal, tur den nan trinta aña caba.

E necesidad di cambio no tabata solamente pa un team nobo; e club tin tambe un debe di cerca di mitar biyon euro; cambia hungadornan di edad y cu salario grandi, tabata necesario.

Ken e hobennan aki ta? Ansu Fati ya ta buscando fama internacional, aunke apenas 17 aña, naci na Guine Bissau y desde su 10 aña den e sistema di Barça, ta un di e atacantenan cu tin un puesto fiho caba, luciendo den temporada pasa y den seleccion nacional di Spaña.

Otro hoben ta Riqui Puig, 21 aña, cu a bira un di mediocamponan den base di e team. E tabatin problema inicial pa convence Koeman pero a cuminza aparece riba cancha.

Pedri, 17 aña, cumpra pa 5 miyon euro di Las Palmas, cu 37 partido hunga caba den seleccion di Barcelona riba medio campo. Otro hungador clave caba ta Francisco Trincao, 20 aña, di Portugal, cumpra di Braga pa 31 miyon euro. Ta mira Trincao como reemplazante pa Antoine Griezmann cu ta luchando pa convence Koeman. Ta keda pa meniona ainda defensa Sergino Dest, cumpra di Ajax recientemente, y defensa Ronald Araujo (21), di Uruguay.

LEAVE A REPLY

Please enter your comment!
Please enter your name here