CF Barcelona a yega na un acuerdo pa laga nan atacante Luis Suarez bay cerca e rival den La Liga, Atletico Madrid.

Suarez notabata desea mas na Barcelona, segun coach nobo Koeman, y e club Catalan lo tabata contento di por yega na un areglo cu ta laga Suarez sali, basta e no bay na un otro club importante den La Liga.

E Uruguayo a yega na un acuerdo di salario reduci cu Atletico despues cu un deal cu Juventus no por a sigui pa motibo di problema pa haya un pasaporte Italiano. Pero presidente di Barcelona Josep Maria Bartomeu a para e deal pasobra e no tabata kier mira Suarez bay na un di e rivalnan mas grandi di Barça. Sin embargo, despues di reuni cu representantenan di Suarez, e club Catalan a hala atras, supuestamente pasobra Suarez a menasa di hiba su critica pa medionan di comunicacion.

Atletico lo mester paga un suma modesto di no mas cu 4 miyon euro pa e hungador di 33 aña, cu ta depende di entre otro cualificacion pa Champions League. Suarez lo gana mitar di e 30 miyon euro cu e tabata haya na Barcelona, cerca Atletico.

E deal ta pone un fin na e carera di seis aña di Suarez cu Barça, durante cual el a score 198 gol den 283 partido, y tabata forma parti di e temible ataque di e club, hunto cu Lionel Messi y Neymar. El a yuda nan gana cuatro titulo den La Liga, cuatro Copa el Rey y Champions League y Copa Mundial na 2015.

Asina a yega un fin tambe na un di e storianan mas largo di e verano aki, cu por a termina cu Suarez na Juventus, banda di Ronaldo, pero cu a fracasa pa e tempo largo cu lo a dura pa obtene un pasaporte Italiano pa Suarez.

LEAVE A REPLY

Please enter your comment!
Please enter your name here