Mientras na Alemania e promer di dia di competencia den liga mas halto di e pais a tuma lugar den fin di siman pasa, awor Bundesliga lo bay recorda hungadornan riba e reglanan pa reanuda wega despues di anota gol. E hungadornan di Hertha Berlin a completamente lubida cu no ta permiti celebracion di gol cu brasamento y demas muestra di emocion conhuntamente, unda no a respeta e distancia requeri, den nan victoria di 3-0 contra na Hoffenheim.

DFL, e liga di futbol Aleman, a bisa caba cu no lo castiga Hertha pa e infraccion cometi durante nan celebracion di e golnan. Sin embargo, hefe ehecutivo internacional di Bundesliga Robert Klein a bisa cu mester respeta e normanan. “Tin regla bon cla. Nos mester pa tur hende respet nan.”

“Mester celebra dentro di e reglanan di distanciamento social. Bo por imagina cu ora score un gol e hungadornan ta yega mas cerca otro. E clubnan ta papia tur dia cu nan pa corda nan riba loke mester haci pa sigura cu nos ta gana e derecho di un di dos dia di competencia, y un di tres, y pa termina e temporada.”

Klein ta mira e promer fin di siman di competencia den e liga mas halto na Alemania despues di e crisis di coronavirus como un exito. A pesar di preocupacion, e no a haya informacion di grupo di fanatico den cantidad significativo na e stadionnan pa wak wega. “Esey tabata un alivio grandi.” E fanaticada ta comprende e tempo inusual cu nos ta bibando aden. Tin ora e peticionnan aki ta dificil pa nan acepta pero tur cos a bay bon.”

Klein no a haya ningun informacion di test positivo di Covid-19 alrededor di e weganan y mientras cu e reunion semanal cu e clubanan ta sigui normal, e no ta na altura di ningun incidente cu por ta un obstaculo pa e siguiente weganan den fin di siman, despues di cual lo bin tambe e weganan meymey di siman, entre nan e encuentro entre e lider Bayern Munchen y number dos Borussia Dortmund dia 26 di mei venidero.

 

LEAVE A REPLY

Please enter your comment!
Please enter your name here