Campeon di Australian Open, Naomi Osaka, ta e prome hungado di Asia pa top e ranking di tennis, tanto masculino como femenino – y ta e muhe mas jong di haci su debut na #1 den nuebe aña.

“Mi ta sinti manera literalmente ainda mi ta siñando”, Osaka, di 21 aña di edad, a bisa. “Cada ken ta ahusta mas of menos di ta #1 den diferente manera.”

E 48 siman riba top di ranking di WTA di Simona Halep a caba ayera, ora cu el a slip na #3, despues di un perdida den di cuater ronda contra Serena Williams, un aña despues cu el a yega na e final na Melbourne Park.

“E meta principal ta pa djis hunga mas bon cu mi por cada wega, pa gana tur wega cu mi hunga, pues e ranking no ta echt importante”, Halep a bisa. Halep a bisa cu e ranking di fin di aña ta ‘mas importante’ cu unda ta awo, ‘pues mi no ta bay stress mi mes pa esaki’. E di dos titulo consecutivo pa Osaka, despues di su exito na e U.S. Open aña pasa, a yud’e subi tres luga.

El a nace na Hapon – su mama ta Hapones, su tata ta di Haiti – y a muda na Merca ora e tabatin 3 aña. E tin nacionalidad dobel, y awo ta basa na Florida. Osaka ta e muhe di mas jong pa alcansa e top desde 2010, ora cu Caroline Wozniacki a haci esaki cu 20 aña di edad. E finalista na Melbourne Park, Petra Kvitova, a bula di #6 pa #2. Sloane Stephens ta #4, y Karolina Pliskova a subi di #8 pa #5.