ORANJESTAD – Diamars anochi e Comision Anti-Doping a tene un anochi di informacion pa e delegacion di Aruba cu lo ta biahando proximamente pa e Weganan Sur Americano di Playa Rosario 2019.

Presidente di e Comision Anti Doping, Patrick Werleman a elaborando riba e topico doping, kico tur lo mester haci y tene cuenta cu ne. Tambe a splica riba e diferente instancianan y nan trabou relaciona cu “anti-doping” den e deporte mundial manera WADA, RADO y CAD Comicion Nacional Anti Doping. Aki mas cu claro e presenta e “prohibited list” di World Anti-Doping Agency(WADA).

Representante Elimay Bello a elabora specificamente riba e dopahe, substancianan prohibi y e lista di WADA. Tambe e la mustra riba e consecuencianan cu dopahe lo por trece cu ne pa cada deportista. Esaki lo trece sancionan severo ora un atleta wordo gara ta uza dopahe. Un mancha completo pa e atleta, su deporte y su pais cu e ta representa. Dr. Ricardo Vargas a splica di Therapeutic Use Exemption(TUE).

Un otro topico interesante sin duda tabata e Whereabouts cu ta un aspecto obligatorio cu tur atleta mester tene nan mes na dje, e ta un obligacion pa mantene tur cos actualisa.

Doping Control Officer, O’neil Romero a elabora riba e control di dopahe y a splica con e proceso di dopahe ta tuma logra ora controla esaki. A duna un demostracion con un doping control lo mester tuma luga.

Na final Patrick Werleman a duna informacion di e link nan importante pa e atletanan haya sa mas riba e topico anti doping.