Cristiano Ronaldo ta acercando e marca envidiable di 100 gol como integrante di ekipo nacional di Portugal. El a caba di anota number 99 den e partido di clasificacion pa Campeonato Europeo 2020 contra Luxemburg diadomingo pasa.

E actual atacante di Juventus den competencia di Serie A lo ta solamente e di dos persona pa logra 100 gol pa nan ekipo nacional.

Ronaldo ta e topscorer principal di Portugal na basta distancia. Sin embargo, e tin un hungador menos conoci su dilanti riba tereno internacional. Esey ta e hungador Irani Ali Daei, cu a marca 109 gol pa su pais. Despues di Ronaldo ta sigui Ferenc Puskas, un di e astronan grandi di e Real Madrid di añanan 60, cu 84 gol. Despues ta bin tres hungador menos conoci, Kamamoto (80) di Hapon, Chitalu, Zambia (79), y Hussein Saeed, Irak, cu 78. Na puesto 7 ta bin e legendario Pelé, cu 77.

Si e fanaticonan di e Brasileño ta decepciona, no tin motibo pa esey: Ronaldo a logra 99 den 164 partido; Pelé a logra 77 den solamente 92 partido na nivel nacional. A proposito, e rival grandi di Ronaldo, Lionel Messi, ta na puesto 14, cu 70 anotacion den 138 partido. Ronaldo ta sali victorioso aki cu un promedio di .60 gol pa partido; Messi ta keda na .50 goal. Nan niun di dos sin embargo ta yega na e fenomenal .83 gol pa wega di Pelé.

 

LEAVE A REPLY

Please enter your comment!
Please enter your name here