ORANJESTAD – Despues di a ricibi varios oferta di MLB Teams, Ethan de Cuba a acepta oficialmente e oferta di Kansas City Royals.

Ethan ta profila como e miho prospecto di Aruba pa 2019 y awor lo sigui cosecha exito cu Kansas City despues cu e firma na juli proximo cu Edson Kelly, scout di Kansas City pa Aruba, kende por cierto a firma Cal Maduro aña pasa tambe. Mester menciona cu Rene Francisco, Assistant General Manager di Kansas City Royals a forma parti di negociacion y oferta pa asina sigura cu Ethan lo opta pa hunga cu Kansas City.

Na Aruba Ethan semper a hunga cu Stars Organization y a sa di representa su pais Aruba den varios competencia afo. Ethan tin mas cu 1 aña den training extensivo cu Elwin Rincones, Egdard “Dongo” Croes, Tony Kelly y Eugene Kingsale pa asina ta cla pa su proximo etapa den MLB. Esaki ta segun e fuente Sports Zone Aruba.

Mester bisa cu aunke Kansas City tabata kier a manda Ethan Merca di biaha, toch e la opta pa pasa un aña na Dominicana pa asina amplia su experiencia riba nivel di MLB y yega Merca miho prepara.