Diadomingo ultimo a tuma luga e ultimo seminario di ‘kata y kumite’ (bringamento imaginario tecnico y bringamento real) di ‘sensei’ Yannis Venizelos di Spaña. ‘Sensei’ Yanis Venizelos ta un 5to Dan JKA/WKF/RFEK. Tambe e ta un arbitro mundial cu hopi experiencia. E ta conoci mundialmente como e entrenador di e conocida karateka y medayista mundial Andrea Armada di Venezuela.

Tabata un mainta yena di hopi energia unda e ‘sensei’ Yannis Venizelos a duna un tremendo seminario yena di hopi tips con pa e karatekanan coregi nan tecnica. Pa 3 ora largo e instructor aki a sa di pone tur su conocemento na disposicion di cada karateka, haciendo e sala di gymnasio di Maria College MAVO un explosion total di sodo, esfuerso y dedicacion. Na mes momento, e seminario aki ta finalisa e campamento y preparacion special di e seleccion. Janilaine Bello, Alejandro Gonzalez Lujan y Juan David Velasquez a train duro pa asina sigui subi nan nivel di tecnica den karate.

Presidente di Aruba Karate Bond, señor Felix Tromp, ta gradici Ryubu Kai Aruba (‘sensei’ Jose Vivas), Shotokai Aruba (‘sensei’ Alberto Gonzalez Lujan) y Dojo Gyoseki Kan (‘sensei’ Gustavo Velasquez) pa participa na e seminario. Ta haci uzo di e oportunidad pa gradici tambe Stichting Sportsubsidie Aruba, Aruba Sport Unie y Comite Olimpico Aruba pa sostene e proyecto aki.

 

LEAVE A REPLY

Please enter your comment!
Please enter your name here