E crisis di coronavirus ta percura pa cambio drastico den futbol tambe. FIFA a acepta pa realisa cinco cambio pa equipo den un partido di futbol.

E organismo mas halto di futbol a acorda haci un cambio temporal den e reglanan di custumber pa “proteha bienestar di e hungador”. Por aplica e regla aki den torneo cu ta finalisa promer cu 31 di december 2020. Tambe lo permiti cu ta keda sin usa VAR den e liganan cu a pone esaki den funcionamento caba.

Cada equipo lo por realisa cinco cambio den un mesun partido, pero e regla ta conta solamente pa torneo cu ta finalisa 31 di december 2020. E pandemia causa pa e coronavirus Covid-19 a causa un momento inusual den e torneonan di futbol di mayor parti di mundo: casi tur e liganan a para nan actividad por completo, sin siquiera permiti training. Na mesun momento e promer paisnan a cuminsa reanuda accion cu training y planificacion di reinicio di campeonato, y FIFA a saca un medida inusual pa cuida salud di e deportistanan, cu mas cambio durante e mesun partido.

Sin embargo, mester tuma na cuenta, cu pa reduci e cantidad di interupcion di partido, cada equipo tin solamente tres oportunidad pa haci substitucion. Tambe por haci cambio durante half time.

E regla provisorio aki a keda anuncia diabierna 8 di mei y ta di efecto inmediato, es decir cu por aplica esaki den tur competencia na mundo andando o na punto di cuminsa. Sin embargo, e no ta obligatorio: “E decision di aplica e cambio di regla aki ta keda na discrecion di cada organisador individual di e competencia.”

LEAVE A REPLY

Please enter your comment!
Please enter your name here