E medidanan severo cu gobierno Hulandes a tuma e siman aki pa para e desaroyo negativo di coronavirus no ta toca futbol profesional cu un prohibicion total, pero si ta prohibi presencia di publico den e stadionnan. Esey ta un golpi duro pa e clubnan cu despues di e aña dificil aki pa via di Covid-19, ainda no por logra entrada di e publico cu ta presencia e partidonan.

E excepcion ta conta solamente pa Eredivisie y Keuken Kampioen Divisie, mientras tur otro deporte unda no por mantene e 1,5 metro di distancia, ta prohibi. Premier Rutte: “ Futbol profesional den ere- y eerste divisie por sigui riba mesun pia, pues sin publico,” refiriendo na e decision di fin di september cu por hunga cu tribuna bashi. E medida tabata conta pa tres siman pero awor ta keda prolonga pa cuatro siman mas.

E clubnan profesional den e promer simannan di e temporada nobo por a permiti un cantidad limita di fanatico. Nan a haya si e instruccion pa mantene distancia y no haci boroto gritando duro, loke supuestamente ta yuda pa no plama e virus. Esey no a bay asina malo, salvo algun incidente. Sin embargo e gabinete a dicidi luna pasa pa cera porta di e stadionnan atrobe.

E golpi financiero di e perdida di entrada di publico ta bin riba e golpi di e perdida di e temporada anterior cu a keda corta na momento cu e crisis di Covid-19 a cuminza.

Ajax, e club cu e stadion mas grandi di Hulanda, a perde e promer dos partidonan di competencia na cas ya caba como 3 miyon euro, pasobra a permiti 12.000 fanatico so, segun director general Edwin van der Sar. Ajax otro siman ta cuminza participa na Champions League cu un partido contra Liverpool. Esey lo tuma lugar den un Johan Cruijff ArenA bashi.

LEAVE A REPLY

Please enter your comment!
Please enter your name here