Estudio antropologico ‘Breathing Unevenly: community response to Environmental Injustice’

Tin un inhusticia ambiental tumando luga den e comunidad rond Parkietenbos y esaki ta motibo pa desconfianza den institucionnan, organisacionnan y sigur Gobierno. Es mas, “’Trash to Cash’ ta un perdida di tempo. E ta djis un otro intento pa rapportnan cu ya caba t’ey.”

Esaki ta locual a sali afo di e investigacion ‘Breathing Unevenly: Community Response to Environmental Injustice; a case study of Aruba’s Landfill and the Parkietenbos community,’ di Laura Mathieu. E expresionnan aki no ta algo cu mester keda sorprendi di dje. Henter e desaroyo cu y rond Parkietenbos y e inhusticia ambiental ta lanta desconfianza.

E investigacion ta uno di antropologia politico cu ta tira bista riba caracteristicanan di comunidad pa medio di un lens politico, unda ta enfoca riba asuntonan manera desigualdad socioeconomico, procesonan institucional y cambio politico. Banda di conceptonan principal di ciencia politico, e ta incorpora tambe procesonan social, cultural y informal. Consecuentemente, como antropologo politico, Matthieu a kestion e nocionnan normativo cu ta constituciona politica.

Mathieu a enfatisa cu su entrevistanan tabata basa unicamente riba e proposito di investigacion, sin un agenda politico y otro. “Mi ta un hende di afo cu poco gara riba contexto di e isla. Y kizas pasobra mi ta un stranhero, e por a influencia e contesta di e respondentenan.” Di otro banda, Laura Mathieu tabata conta cu partner investigativo Kailey Campos, di Aruba y studiante na Universidad di Aruba cu a asisti den establece contactonan y traduci unda tabatin mester.

Datonan

Segun cifranan di 2018, Aruba ta produci entre 130 pa 150 mil kilo di desperdicio pa aña. Serlimar ta maneha dump di Parkietenbos y Ecotech ta procesa mayoria sushi comercial y di cas, separando prome e metalnan y carton, pa despues hinca e sushi den baliña cu ta bay Ser’i Teishi. Aunke cu Ecotech ta recicla, e calculacion ta cu unicamente 2.4 porciento di sushi di cas ta recicla, segun cifra di 2018. E resto di sushi cu no por trata ta bay dump, sin ningun separacion. Dump na Parkietenbos ta data di 1954 y a crece exponencialmente durante e 68 añanan aki. Segun Serlimar, dump a yega su capacidad maximo na 2006 y lo mester a cera na 2011. Pero Gobierno a bisa na 2018 cu tin dos aña ainda pa yega su capacidad maximo (esta na 2020). Pero awae dump ta habri y creciendo y ta cubri un espacio di 18 hectar, cu un haltura di 42 meter, surpasando tur e casnan den e bario. Y pa motibo di tur e deposito ilegal di sushi, ta dificil pa bisa cua ta e tereno oficial di dump, cu ta penetrando e mangelnan den cercania.

Menasa ambiental

Menasa ambiental hopi biaha ta presenta risico particular na cierto individuo, grupo of comunidad. E ta resulta den e peso of beneficio ambiental desproporcional pa cierto demografico. E concepto di husticia ambiental ta demanda cu tur hende y comunidad merece proteccion igual y den e contexto aki e ta bira un debate politico, cu punto di bista conflictivo. Por ehempel, den hopi parti di mundo, comunidadnan di hende di color of pober ta biba mas cerca di facilidadnan cu ta peligroso pa medio ambiente y ta mas probable di ta carga e peso di ta exponi na toxicidad, cu tin impacto negativo riba salud y calidad di bida. Esaki ta cay bao e categoria di imhusticia ambiental, cu tambe tin e factor socio-politico. Por ehempel, tin estudio internacional cu ta mustra cu Gobierno lo no pone un incinerado den un comunidad cu tin recurso y representacion politico fuerte pa bringa un proyecto asina.

“Tin diferente reaccion politico ora di inhusticia ambiental. E reaccionnan aki of falta di nan por kibra individuo y comunidadnan, ya cu structura existente pa accion colectivo no por responde adecuado na e peligernan ambiental. Pero e inhusticianan aki no mester laga un comunidad sin ningun poder. E ta permiti diferente version di empoderacion pa nace. Di otro banda, investigacion academico ta ilustra cu hopi biaha tin poco comunidad cu berdad ta tuma accion y no tin un imagen cla kico ta e factornan cu ta limita mobilisacion. Estudionan na Merca a mustra cu si Gobierno of industria ta nenga di comparti data cu publico of ta nenga cu tin problema, comunidad ta haya desconfianza y e circunstancianan ta bira pio, particularmente si ta perde confianza den institucion cu mester brinda proteccion. Riba dje, esnan cu no ta confronta e mesun problema ambiental no ta compronde nan co-ciudadanonan.

Inhusticia ambiental na dump di Parkietenbos

E investigacion ta conclui cu Gobierno a ignora diferente rapport, incluso esun di PAHO, cu ta bisa cu dump a yega su capacidad maximo y ta un risico pa e residentenan. A sigui tira sushi, cu a pone cu hopi ta cay den lama. Aruba ta miembro di varios tratado internacional riba derecho humano, cu de facto ta obliga Gobierno pa sigura proteccion na un ambiente saludabel. “Pero esaki no ta e caso. Mi investigacion a mustra cu e salud di tanto medio ambiente como di e comunidad ta na peliger.”

Residentenan pa aña a keha di molester di holo, gas peligroso y polucion na dump. A lanta e fundacion Stichting Parkietenbos na 2002 pa atende cu e kehonan aki, cu meta pa crea conscientisacion riba e dump. Pero ora cu candelanan a cuminza atrobe na comienso di Juli 2018, e fundacion no tabata exitoso den su accion y eynan un ciudadano a dicidi pa tuma accion riba su mes contra Pais Aruba.

E aña ey tabatin un Request for Information di parti di Gobierno na 2018, pa yega na decontaminacion di dump y yega na otro opcion di procesamento di sushi. Pero e RFI no a bay segun regulacionnan stipula pa Union Europeo, tabata e critica di Stichting Parkietenbos, ya cu tin maneho limita riba maneho di sushi y practicamente ningun ley pa controla e dump. Na 2009, Aruba a inverti 28 miyon den e proyecto ‘WastAway’ di Baoldin & Lawson cu nunca a bira operacional, memey di speculacion cu a sabotia e ekipo. Mientrastanto a instala un incinerador riba dump, pero e ta mucho chikito pa kima tur e sushi presente.

Calidad di bida afecta

Locual si ta hopi cla cu gran mayoria di esnan entrevista a bisa cu presencia di e dump y e facilidad di Ecotech a daña nan calidad di bida drasticamente. Mita di e respondentenan a raporta problema di salud den famia, for di cancer te na asthma y migraine persistente. Un total di 17 famia di 19 entrevista a bisa cu e dump ta afecta salud di e bario. Esnan cu ta biba mas cerca di Ecotech ta papia di molester di holo y musca cu ta afecta nan bida social na cas.

Pero tur respondente a expresa preocupacion pa medio ambiente, particularmente e contaminacion di tera, awa. E dump ta contene nivel halto di asbestos, cu ta un peliger pa salud, tin metal pisa y otro material peligroso cu te ainda no a haci nada cune, mientras cu tin speculacion di presencia cu a benta desperdicio radioactivo riba e dump, pero e investigado no por a haya ningun documento pa confirma esaki. “Un problema cu ta keda ta e reserva di industria y Gobierno pa investiga e temanan aki y publica informacion. Tin un falta di transparencia consistente for di e organonan cu a conduci na falta di accion.”

Pa tal motibo mes e comunidad rond Parkietenbos ta kere cu situacion lo no mehora tanten cu no cera e dump. Nan ta acepta si cu e sushi mester bay otro caminda, pero no tabatin consenso riba con e siguiente paso mester ta. Ryclahe, exportacion di sushi, mina e dump tur a keda menciona.

Solucion di Gobierno y resistencia

E solucion di Gobierno pa pone un bandera pa indica ki ora biento ta bira no ta funciona. Segun mas repondente. Aunke cu e bandera bira direccion di e casnan, e candelanan mester para, pero realidad ta cu e holo ta keda.

E iniciativa Trash to Cash di su banda a lanta discusion memey di e respondentenan di e barionan rond Parkietenbos. Varios habitante den e barionan den cercania di dump di Parkietenbos ta sinti cu e iniciativa nobo ta djis pa gana tempo, en bes di tuma accion real.

Residentenan di comunidad di Parkietenbos, confronta cu inhusticia ambiental ta ilustra un variedad di reaccion. Algun tabata totalmente pesimista cu un dia lo tin un solucion pa dump, otronan ta duna nan mes por venci (“no tin sentido mas”) y otronan no kier tende mas di keho. Esaki ta cuadra cu conclusionnan di investigacionnan internacional riba e tema, esta cu inhusticia ambiental ta kibra moral di ciudadanonan, cu no ta expresa rabia “sino mas bien desolacion y falta di confianza,” Laura Mathieu a ilustra, enfatisando tambe cu algun a indica lo keda bringa pa Gobierno cera dump mas pronto posibel.