Number uno den ranking mundial Novak Djokovic a reserva su lugar den final di Open Italiano na Roma, venciendo Casper Ruud. E Serbio, cu a gana e torneo riba gravel aki cuatro biaha, a seya victoria cu 7-5 6-3 riba e Noruego, cu ta rank como number 34.

Un maximo di 1.000 persona tabata permiti riba tribuna pa e promer biaha e siman aki pa presencia accion diadomingo. Djokovic lo hunga contra Diego Schwartzman, cu a elimina Rafael Nadal, o Denis Shapovalov.

“Mi ta tuma tur cos na serio, hasta despues di 15 aña riba e tour, mi ta disfruta esey ainda,” el a declara. “Mi ainda tin apetito pa e titulonan y poniendo mi mes den posicion pa bringa pa e titulo ta exactamente unda mi kier ta.”

Rafael Nadal, e otro candidato grandi pa gana e torneo, ganador 9 biaha caba, a perde den straight sets di e Argentino Diego Schwartzman, pa promer biaha den su carera, 6-2 7-5, mientras e tabatin bastante problema cu su serve.

Schwartzman, cu nunca a yega di gana di un hungador di top-5, a kibra Nadal su serve cinco biaha den un actuacion impresionante y ta hunga contra e Canades Denis Shapovalov.

Den categoria femenino, ‘top seed’ Simona Halep lo bay contra Garbine Muguruza  di Spaña den semi-final, un bataya di ex-campeonnan di Roland Garros cu ta topa aya tambe desde 27 di september.

Halep a pasa pa e proximo vuelta despues cu Yulia Putintseva a retira di e partido cu lesion mientras e tabata perdiendo 6-2 2-0, mientras Muguruza a derota finalista di US Open Victoria Azarenka 3-6 6-3 6-4.

Dos vez campeon di Roma Elina Svitolina, cu a dicidi di no hunga na US Open pa prepara pa e temporada di gravel, a perde facilmente cu 6-3 6-0 di Marketa Vondrousova, ken lo hunga contra compatriota Karolina Pliskova o Elise Mertens di Belgica den e otro semi-final.

LEAVE A REPLY

Please enter your comment!
Please enter your name here