Segun manager nobo di Barcelona, Ronald Koeman, a bisa cu Lionel Messi su prestacion “por ta mihor” pero ta bisa tambe cu e capitan di Barcelona ta “feliz”.

E atacante Argentino e trata di bay for di Barcelona e verno aki, pero no a logra pa via di clausula den contract cu a impedi un transfer sin un multa grandi. Finalmente el a keda pero cada partido ta suheto na analisis critico di amigo y enemigo.

Te awor Messi a anota un solo gol den temporada cu a cuminza recientemente. “Mi no tin keho o duda di su esfuerzo,” Koeman a bisa, cu ta inicia Champions League contra Ferencvaros cu su team e siman aki. “Awor aki su prestacion por ta mihor. A base diario, e ta feliz y kier hunga y ta e capitan di e team.”

Messi y Barcelona a caba di haya un spanto grandi cerca Getafe den fin di siman sufriendo e promer derota di temporada y no tabata den nan mihor forma. Messi, den su aña final na Barcelona, den Grupo G di Champions League lo bay topa cu Juventus y Cristaino Ronaldo, un encuentro hopi anticipa pa e fanaticonan, unda niun di dos lo kier luci e menor. Barcelona tin e presion di no a gana Champions League desde 2015. Tambe lo ta den wega e ‘Ballon d’Or’ pa e temporada aki, despues cu 2020 a pasa bay sin e maximo trofeo pa hunador individual. En todo caso, e rivalidad mas grandi di e decada aki no a pasa ainda.

Koeman di su banda ta trata pa no exagera e perspectivanan pa su club, cu tin su desafionan. “Nos no ta e faborito, pero nos por yega leu.”

 

LEAVE A REPLY

Please enter your comment!
Please enter your name here