Despues di un eterno rancamento di cabuya entre gobierno Italiano, e clubnan y e Federacion Italiano di Futbol cu a dura varios luna, ayera a porfin huma blanco a sali pa Serie A, e liga profesional mas halto, por reinicia su temporada dia 20 di juni.

“Awor tin condicion pa bolbe,” ministro di deporte, Vincenzo Spadafora, a declara despues di un reunion cu tur partido envolvi. Te na e momento ey e ministro a mustra duda pa reapertura di e stadionnan y a frena na varios ocasion e anhelo di e Liga pa reanuda actividad. E ministro tambe a señala cu nunca tabata su intencion “di pone obstaculo”. Y el a sugeri cu, “como señal positivo pa henter e pais,” desde 13 di juni por disputa e semifinal y final di Copa Italia, cu ta entre Milan, Juventus, Napoli y Inter Milan.

Durante algun siman e partido tabata parce perdi. E regreso di Serie A tabata parce di no ta sikiera den e plannan di gobierno pa fase 2 di reapertura di e pais. Y ministro Spadafora a yega di papia di “cuminsa pensa riba otro aña”. Futbol Italiano a cuminsa prepara pa un probable suspension y perdida miyonario cu esey lo a trece cune. Na mitar di mei e clubnan di promer division a presiona ‘en bloc’ gobierno pa bolbe riba cancha dia 13 di juni, pero e ministro di deporte a bolbe para e equiponan y a bisa cu e competencia lo bolbe solamente ora por garantisa seguridad total.

E problema fundamental ta uno economico. Futbol ta un negoshi di 100.000 empleado y parando e competencia completamente pa e aña aki, e perdida lo ta por lo menos 700 miyon euro, segun Gabriele Gravina, presidente di e federacion Italiano.

 

LEAVE A REPLY

Please enter your comment!
Please enter your name here