Messi segun Forbes a bira di dos futbolista biyonario den historia. E revista di negoshi Mericano a calcula cu e atacante Argentino a pasa e limite di 1.000 miyon dollar na entrada. Riba e lista di e futbolistanan mihor paga Messi a pasa pa ocupa e promer lugar atrobe.

E atacante di 33 aña den e temporada cu a termina a gana 126 miyon dollar na salario y deal cu sponsor. Cristiano Ronaldo, e rival ‘eterno’ di Messi cu ta na Italia cerca Juventus, por a administra segun Forbes 117 miyon dollar. Na juni Forbes a anuncia cu Ronaldo tabata e promer biyonario cu ta gana su placa cu futbol.

Di e demas profesionalnan di futbol ta solamente Neymar ta yega mas o menos cerca di e dos grandinan, elegi respectivamente seis biaha (Messi) y cinco biaha (Ronaldo) como mihor hungador di mundo. E astro Brasileño di Paris Saint-Germain a haya den temporada pasa 96 miyon dollar na entrada. Su compañero di equipo Kylian Mbappé a drenta lista di Forbes tambe, na puesto cuatro di e futbolistanan cu temporada pasa a gana mas placa, cu mas di 40 miyon dollar na edad di 21 aña.

Di e manera aki Messi por a join un otro club mientras cu toch el a keda na Barcelona. E club tin nombernan manera Tiger Woods, Floyd Mayweather y su rival Cristiano Ronaldo.

E top 10 di hungadornan mihor paga hunto a gana $570 miyon e temporada aki, 11% mas cu aña pasa, a pesar di e pandemia y su efecto riba economia.

Michael Jordan tambe ta den e club di biyonario pero e leyenda di basketball a gana su fortuna pa gran parti despues di bandona deporte, a traves di su contract cu Nike y su compra di Charlotte Hornets den NBA.

LEAVE A REPLY

Please enter your comment!
Please enter your name here