Novak Djokovic a bolbe den accion despues di su retiro pa descualificacion na US Open den Open di Italia na Roma. Den promer encuentro el a topa cu Salvatore Caruso pa un victoria relativamente facil. Djokovic a pone Caruso un banda cu 6-3 6-2 pa asina cuminza e torneo cu un tono positivo.

E number uno di mundo a keda descualifica na New York den su partido contra Pablo Carreno Busta ora el a dal un line judge cu bala accidentalmente.

E torneo di Roma ta ser considera un preparacion pa e Open di Francia na Roland Garros, cu ta cuminza dia 27 di september.

Number dos pa e torneo, Rafael Nadal, cu tin mas di seis luna sin mira accion, tambe no tabatin problema pa pasa den su promer desafio, derotando e mesun Carreno Busta 6-1 6-1 despues cu el a haya un bye pa promer vuelta.

Nadal a evita bay US Open preocupa pa Covid-19 den e ‘bubble’ crea pa e evento y a keda Europa pa prepara sin competi. Sin embargo el a mustra poco señal di falta di ritmo competitivo.

“Ta bon pa ta back na e tour pero obviamente e sentimento no ta e mihor hungando sin publico,” Nadal a bisa. “Por lo menos tin algo positivo, e deporte ta back.”

Y e astro di 34 aña a añadi: “Mi a hunga un bon partido. Talvez e (Carreno) tabata un poco cansa ainda di New York unda el a hunga un bon torneo.”

Promer di hunga den Italian Open, Djokovic a bisa cu e mester “move on” despues di e controversia na Flushing Meadows, pero a añadi cu e lo nunca lubida e incidente.

LEAVE A REPLY

Please enter your comment!
Please enter your name here