PSG Neymar is seen before the French League One soccer match between Bordeaux and PSG at the Matmut stadium in Bordeaux, southwestern France, Saturday, Sept. 28, 2019. (AP Photo/Bob Edme)

Prome cu su di 100 partido cu Brasil, Neymar ta insisti cu ainda e ta merece trato special den team nacional, a pesar cu nunca a gana un titulo mayor den su nuebe aña bistiendo e famoso camisa geel.

E delantero di 27 aña di edad lo alcansa e marca di 100 den un partido amistoso contra Senegal na Singapore awe, y a defende su status como e strea mas grandi den e team, a pesar cu Brasil a gana e Copa America e berano aki sin dje.

“Mi semper tabata un di e figuranan principal y un di esunnan cargando tur riba mi lomba”, Neymar a bisa den un conferencia di prensa ayera, contestando tocante trato special. “Mi semper a hunga mi rol den team nacional hopi bon. Ora un hungado alcansa e nivel ey, ta normal cu tin trato diferente.”

E comentarionan di Neymar ta yega na un momento den cual algun fanatico di Brasil a acusa coach Tite y e confederacion di futbol Brasileño di ta demasiado suave cu e delantero tocante su problemanan fuera di e cancha. Esey ta inclui su altercado cu un fanatico despues di e final di Cup Frances na april; su insistencia pa permiti entrada di su tata/agente den camerino di Brazil durante un partido amistoso prome cu Copa America; y un acusacion di violacion cera recientemente pa polis.

Actualmente Neymar tin problema cu fanaticonan di Paris Saint-Germain tambe, despues di a purba di forsa un retorno na Barcelona durante offseason.

Y na Brazil, e ta keda e hungado mas polarisante.

Su estadisticonan cu e team nacional ta impresionante: 61 gol y 42 asistencia den 99 wega te awo. Esey ta pon’e un gol tras di e dos-biaha campeon di Mundial, Ronaldo, kende ta na di dos luga den e lista di top anotado den historia di Brazil, cu 62. Pele ta na cumbre di e lista cu 77.

Cu Neymar den e team, Brazil tin 70 victoria, 19 empate y 10 derota. Pero apart di e Confederations Cup di 2013, ningun titulo.

Durante e mundial 2014 na cas, Neymar a lesiona su lomba durante e victoria den quart final contra Colombia, y Alemania a humiya e team 7-1 den semi final sin dje. Durante e mundial na Brazil aña pasa, e tabata recuperando di un lesion di pia y no a haci mucho impacto mientras Brazil a perde 2-1 contra Belgica den quart final.

Y e berano aki tambe e mester a falta na e Copa America pa un lesion sufri poco prome cu e torneo.

Contestando tocante su miho memoria cu team nacional, Neymar a menciona su debut, su debut den Mundial na 2014, y e gol cu el a anota den e wega di apertura pa e torneo contra Croacia. “Tin un balans positivo, pero no ta trata solamente di victoria den bida di un atleta”, Neymar a bisa.

 

LEAVE A REPLY

Please enter your comment!
Please enter your name here