For di 1 pa 8 december 2019 a wordo teni e Campeonato Suramericanos Sub-15,Sub-17 y Sub-20, Copa Iberoamericano, Buenos Aires Open y Copa Tamas Ajan de Levantamiento de Pesas. Den e campeonato aki tambe por a clasifica pa e Weganan Olimpico di Tokio 2020. E competencia aki  wordo teni den e Centro Nacional de Alto Rendimiento Deportivo (CENARD) na Buenos Aires, Argentina. Tabata tin participacion di 15 pais cu ta Argentina, Aruba, Bolivia, Brasil, Chile, Colombia, Curaçao, Ecuador, Spaña, Guatemala, Panama, Paraguay, Peru, Uruguay y Estados Unidos, 

Aruba a participa cu un delegacion di 3 atleta cu ta consisti di Nicole Dijkhoff den categoria di 71kg den Sub-17, Jeremy Dijkhoff den Categoria 89kg Sub-15 y Laertes Araque den categoria di 89kg Sub-17. Como coach a fungi Walter Llerena intrenador internacional for di Ecuador.

Nos prome atleta cu a subi plataforma tabata Nicole Dijkhoff cu tabata tin 9 atleta den su categoria di 71kg. Nicole ta logra den su hisadanan den snatch 68kg, clean & jerk 85kg pa un total di 153kg. Cu e total aki  Nicole den Sub-17 ta termina na di tres luga ta gana medaya di Brons pa Aruba den Copa Suramericano Open. Prome luga medaya di Oro a bay pa Kelin Jimenez Quinonez di Ecuador y medaya di Plata a bay pa Katherina Szebun di Argentina, Den e Buenos Aires Open Internacional Medaya di Oro a bay pa Dawn Cooper di Estados Unidos y Nicole Dijkhoff cu medaya di Plata pa Aruba.

Despues nos ta haya Jeremy y Laertes cu a bay bon prepara ta subi plataforma na unda tabata tin participacion 11 atleta den e categoria di 89kg den Sub-15, Sub-17, Sub-20 y Senior. Jeremy ta logra den su hisadanan den snatch 95kg, clean & jerk 110kg pa un total di 205kg. Cu e total aki  Jeremy den Sub-15 ta logra prome luga ta gana medaya di Oro pa Aruba den Copa Suramericano Open y segundo luga a bay Joaquin Fuente di Chile cu ta gana medaya di Plata. Na entrega di Medaya di Oro na e atleta Jeremy nos por a scucha e himno di Aruba. Pa Aruba esaki ta algo grandi y ta pa prome biaha den historia di e deporte di pesas nos himno ta wordo toca den un evento grandi asina y hopi paisnan presente a manda palabra di felicitacion pa pais Aruba cu e medaya di Oro pa Jeremy.

Por ultimo nos ta haya e atleta Laertes Araque cu tabata tin un lesion na su pols a logra bataya duro cu su contrincantenan. Den su categoria 89kg den Sub-17 tabata tin 5 atleta ta logra den su hisadanan den snatch 101kg y den clean & jerk 130kg pa un total di 231kg.  cu e total aki Laertes ta logra gana Medaya di Plata den e Copa Suramericano Open. Medaya di Oro a bay pa Nicolas Cuevas di Chile y medaya di Brons a bay pa atleta di Peru. Den e Buenos Aires Open Internacional Laertes ta gana medaya di Brons y medaya di Oro a bay pa Jose Fuentes di Paraguay y medaya di Plata a bay pa Nicolas Benitez. Den snatch Laertes ta logra kibra record di Aruba den Sub-17

Tres atletanan a marca historia den e Campeonato Suramericano na Buenos Aires, Argentina  y cu prospecto den e deporte di weightlifting cu sigur un dia lo por representa Aruba den un wega grandi manera CAC, Odesur, Panamericano y Olimpiada.

Aruba Amateur weightlifting Association kier a manda palabra di gradicimento na Stichting Sportsubsidie Aruba , Lotto pa Deporte y Comite Olimpico Arubano  cu a cubri e gastonan di atletanan pa por a participa na e Campeonato Suramericano di pesas na Argentina. Palabra di pabien na nos atletanan hubenil Jeremy, Nicole, Laertes cu a gana medayanan pa Aruba y entrenador internacional Walter LLerena cu a guia e atletanan.

LEAVE A REPLY

Please enter your comment!
Please enter your name here