Liverpool su back central Virgil van Dijk lo mester cirugia pa coregi ligamento di su rudia despues di e incidente durante e partido contra Everton diasabra pasa, unda el a dal den portero Jordan Pickford di Everton. E partido a termina den un empate: 2-2.

E defensa di seleccion nacional Hulandes di 29 aña no por a sigui hunga despues di e accidente den promer mitar di e partido.

No tin claridad ainda pa cuanto tempo Van Dijk lo ta for di circulacion cu e lesion na su ligamento. El a bay haci un scan promer cu un specialista a confirma e daño na su rudia.

Bolbe di e tipo di lesion aki en general ta tuma varios luna y Liverpool no ta specifica pa cuanto tempo Van Dijk lo ta keda sin mira accion. Cirugia en todo caso no lo tuma lugar inmediatamente y no ta programa ainda tampoco. Fuentenan na e club ta cauteloso cu cualkier expresion y no ta exclui un retorno e temporada aki ainda, ya cu tur cos lo depende di su rehabilitacion.

Van Dijk ta un figura clave den equipo di Liverpool desde cu el a firma cu e club na januari 2018. El a hunga tur partido di e liga pa e club den e ultimo dos temporadanan unda Liverpool a termina na di dos lugar den temporada 2018-2019 pa despues gana nan promer campeonato di liga den 30 aña den temporada 2019-2020.

E Hulandes tabata tambe un figura clave den conquista Champions League na 2019 y eCopa Mundial pa equipo e mesun aña. El a hunga siete partido den e actual temporada di Premier League.

Van Dijk su ausencia ta laga manager Jurgen Klopp cu Joe Gomez y Joel Matip como su principal defensanan central, banda di Nathaniel Phillips, Rhys Williams y Sepp van den Berg.

 

LEAVE A REPLY

Please enter your comment!
Please enter your name here