Cristiano Ronaldo lo haci un biahe no desea na Madrid mañan, y ta spera di declara su mes culpabel di fraude fiscal.
Ronaldo lo ta den e capital Spaño enfrentando acusacionnan relaciona cu su tempo na Real Madrid.
E delantero di Juventus ta wordo spera dilanti hues, y lo por ricibi un sentencia suspendi di dos aña, como parti di un deal cu e fiscal estatal Spaño y autoridadnan fiscal aña pasa. E acuerdo lo costa Ronaldo casi 19 miyon euro den multa.
Na Spaña, un hues por suspende sentencia pa dos aña of menos pa prome ofensa. Na 2017, fiscal estatal a acusa Ronaldo di cuater cargo di fraude fiscal, desde 2011-14 na balor di 14.7 miyon euro. Ronaldo ta acusa di a uza empresa fantasma pafo di Spaña pa sconde ganashi di su derecho di imagen.
Despues di wordo interoga pa casi 90 minuut na un corte na Madrid e tempo ey, e hungado Portugues a bisa e hues cu e nunca a purba di evadi impuesto. E acusacionnan no ta relaciona na su salario di Real Madrid, su club desde 2009 te ora el a uni e campeon Italiano, Juventus, aña pasa.
E presencia di Ronaldo den corte diamars no lo dura mucho largo. Oficialnan a bisa cu el a nenga e opcion di atende cu e corte via video conferencia. Dialuna, e corte a rechasa e peticion di Ronaldo pa drenta e edificio directamente for di e parking lot, cual lo a permiti e pa evita e medionan di comunicacion. E peticion tabata pa motibo di siguridad, pero e corte a bisa cu nan no tabata kere cu e medida tabata necesario a pesar di e notoriedad di e hungado. Separadamente, Ronaldo ta enfrentando un acusacion di violacion sexual na Merca. Kathryn Mayorga a entrega un keho na Nevada september ultimo, unda a bisa cu Ronaldo a viol’e den su camber di hotel na Las Vegas na 2009. Polis a habri di nobo un investigacion riba peticion di e victima. Ronaldo a nenga di a comete ningun fout.
Varios otro figuranan den futbol a wordo investiga pa autoridadnan di impuesto na Spaña den añanan recien, incluyendo Lionel Messi, Jose Mourinho, Javier Mascherano, Marcelo, Luka Modric, Alexis Sanchez, Ricardo Carvalho, Angel Di Maria, Radamel Falcao y Fabio Coentrao. E ex- hungado di Real Madrid, Xabi Alonso, tambe ta spera dilanti hues na Madrid awe. E ta acusa di defrauda autoridadnan di impuesto pa mas cu 2 miyon di euro entre 2010-12. E lo por ricibi un sentencia di cinco aña di prizon, y paga un boet di 4 miyon euro, ademas di e cantidad supuestamente defrauda. E cargonan ta relaciona na e ganashi di Alonso di derechonan di imagen.
.jpg)
