Cristiano Ronaldo ta contesta ministro di deporte Italiano bisando cu no ta berdad cu el a viola reglanan di protocol bulando di Portugal pa Italia despues cu el a test positivo pa Covid-19 na Portugal.

Ronaldo: “Mi no a viola regla, esey ta mentira.” Ministro di deporte di Italia Vincenzo Spadafora a comenta cu Ronaldo a viola e reglanan di conducta pa Covid-19 dos biaha. A pone Ministerio Publico na Italia tambe na altura di e sucedido.

Ronaldo y otro hungadornan di Juventus a sali siman pasa di nan base na Torino pa cumpli cu nan obligacion cu nan pais y seleccion nacional. Seleccion y staff di e club sin embargo lo mester a keda den cuarentena na Torino pasobra a detecta dos caso di e virus entre e staff.

Diamars pasa a bira conoci cu Ronaldo a test positivo na Lisboa pa Covid-19. Mientras tanto el a bolbe na Italia, despues di bula di Lisboa pa Torino den un avion ambulance. Ronaldo lo tabatin aprobacion di autoridadnan di salud na Italia pa haci e vuelo. Ronaldo a anuncia cu e ta continua cu su cuarentena (isolacion) na su cas. Segun Juventus Ronaldo no tabatin sintoma.

“Mi ta continua mi cuarentena na cas. Mi ta mi so, mi famia ta na otro piso. Nos no tin contacto cu otro y asina e lo keda tambe, probablemente pa e proximo 10 dia,” Ronaldo a duna di conoce riba Instagram.

Juventus ta hunga diasabra den Serie A contra Crotone y diamars ta cuminza cu Champions League cu e partido for di cas contra Dinamo Kiev. Posiblemente Ronaldo lo hunga otro siman diadomingo contra Hellas Verona atrobe. Tres dia despues tin programa e encuentro importante contra Barcelona den Champions League.

LEAVE A REPLY

Please enter your comment!
Please enter your name here