Cu un empate den tempo extra, Spaña a ricibi e punto cu e tabatin mester contra Suecia pa clasifica pa e Campeonato Europeo 2020 ayera.

Italia, cual ya a clasifica, a vence Liechtenstein 5-0 pa iguala un record di nuebe victoria consecutivo.

Despues di concede un gol di empate contra Noruega diasabra, pa perde un oportunidad di avansa adelanta, Spaña a logra un empate 1-1 den su bishita na Suecia, cu un gol di Rodrigo dos minuut den tempo extra na Friends Arena.

“Si nos no gana tur partido hende ta cuminsa bisa cu nos no ta hungando bon, pero cosnan no semper ta bay con nos kier den futbol”, Rodrigo a bisa. “Lo importante ta cu nos a clasifica. Awo nos tin tempo pa purba mehora.”

Coach Roberto Moreno a dedica e spot den Euro 2020 na ex- manager di Spaña, Luis Enrique, kende a renuncia na juni pa pasa tempo cu su yiu muhe, kende ta malo di salud.

Suecia ta keda na di dos luga den Grupo F, cinco punto tras di Spaña y un punto dilanti di Romania na di tres luga, cual a desperdicia un chens di laga Suecia atras despues di concede un empate den tempo extra contra Noruega na cas.

Marcus Berg a anota trempan den e segundo mita pa duna Suecia e bentaha, pero e gol laat di Rodrigo for di cerca a preveni cu Spaña lo perde su prome partido di clasificacion – tanto den Campeonato Europeo como den Mundial – desde 2014. Tambe a extende e record di Spaña di na anotacion di sikiera un gol na 38 partido consecutivo.

Spaña tabata sin capitan Sergio Ramos pa motibo di un suspension di carchi geel. E defensa central diasabra a hunga su di 168 partido cu e team nacional, surpasando e record anteriormente teni di Iker Casillas.

Portero di Spaña, David de Gea mester a ser substitui den minuut 60 pa motibo di lesion muscular.

 

LEAVE A REPLY

Please enter your comment!
Please enter your name here