Ta pidi retiro hefe di federacion di ski pa comentario di cambio climatico

DENVER (AP) — Un grupo di atleta di deporte di winter, y e fabricante di snowboard mas grandi di mundo, kier pa e presidente di e Federacion Internacional di Ski presenta su renuncia, despues cu el a papia tocante ‘e asina-yama cambio climatico’ y a bisa cu lo prefera pa traha cu dictadornan en bes di discuti cu ambientalistanan.

E grupo di defensa di clima, Protect Our Winters (POW) a manda un carta habri ayera, urgiendo Gian-Franco Kasper, di 75 aña di edad, pa retira.

Den un entrevista cu e corant Suiso, Tages-Anzeiger, Kasper a bisa cu ‘dictadornan por organisa eventonan (grandi)… sin mester pidi permiso di hende’ y cu ‘for di e banda di negoshi, mi ta bisa: mi djis kier bay cerca dictaduranan, mi no kier discuti cu ambientalistanan’.

Tambe el a referi na e ‘asina- yama’ cambio climatico, y ora a wordo desafia, a contesta: “Nos tin sneeuw, tin biaha masha hopi.” El a mustra riba temperatura frigido durante e Olimpiada di Pyeongchang.

Subsecuentemente, Kasper a pidi dispensa pa su comentarionan, bisando cu no tabata su intencion pa esakinan wordo tuma literalmente. FIS a bisa den un email na AP cu nan no tabatin mas comentario.

POW ta un organisacion sin fin di lucro forma na 2007 pa combati cambio climatico. Algun dozijn di atleta ta parti di e aliansa, cual tambe ta inclui cientificonan y lidernan di negoshi.

Den nan carta habri, cual a inclui in link pa hende por añadi nan nomber na e yamada pa retiro di Kasper, POW a bisa cu e storia di Tages-Anzeiger ta ‘confirma locual nos fuentenan den FIS a bisa nos pa añanan: cu e liderazgo di e organisacion no ta disponibel pa reconoce evidencia cientifico cu ta menasa henter e industria di sneeuw’.

POW ta referi na estudionan cu ta documenta e disminucion rapido di e glacialnan Europeo, y na analisis economico cu ta mustra temporadanan cu menos sneeuw ta causa un ‘caida den balor añadi’ di mas cu $1 biyon, y 17,400 menos cupo di trabou.

“Ora nos a mira esey, di nos perspectiva a bira inaceptabel pa tin cualkier persona den un posicion lider den industria di deporte di sneeuw nengando cambio climatico”, director ehecutivo di POW, Mario Molina, a bisa.

POW tambe a nenga di acepta un donacion di $10,500 cu mester a ricibi diadomingo for di US Ski and Snowboard a traves di su boluntarionan, coachnan, y atletanan.

“Como un muestra di respet pa nan y e accion cu nan ta sostene, nos a nenga e donacion aki y ta pidi na luga di esey pa Gian Franco Kasper wordo retira di su posicion”, e carta habri tabata bisa.

Fabricante di snowboard, Burton, a anuncia cu lo haci un donacion pa reemplasa esun di USSA. “Bo no por duna placa na POW ora e presidente di bo federacion ta nenga cambio climatico y papia di con great e ta pa traha cu dictadornan pasobra no mester preocupa di proteha medio ambiente”, Donna Burton a bisa AP, referiendo na e relacion entre USSA y FIS. “Ta asina obvio. E mester retira.”

Kasper ta presidente di FIS desde 1998. Na 2005, el a hala atencion ora di bisa cu e no ta kere cu salto riba ski ta ‘apropia pa damanan for di punto di bista medico’.

E comentarionan di Kasper a rebiba problemanan entre e comunidad di sport di accion y FIS. Ora snowboarding a drenta Olimpiada na 1998, hopi di e lidernan den sport a warda pasobra nan no a kere cu e federacion – cu su base na Europa y cu tiki background den snowboarding – tabatin nan interes na pecho.

“Di algun forma, e organisacion aki ta perde bista di ken nan mester sostene, cual ta e atletanan”, Burton a bisa.

 

You May Also Like

RCA “Big Wheel Lottery powered by Powerade” ta habri play-off vs Nacional

Soldatnan Tricolor lo ranca sali diasabra pa 8or di anochi den Centro Deportivo Guillermo ...

Di ocho edicion Aruba Caribbean Cargo Taekwondo Cup na caminda

Diasabra awor dia 30 di September ta tuma luga e di  8 Aruba Caribbean Cargo Taekwondo Cup na Centro di ...

6 hoben lo haya chens pa try out na Sparta Rotterdam

Recientemente a  tuma luga s soccer camp di Benu-Sparta-ASA durante e prome siman di ...

Team Taekwondo cla pa Surinam

Den weekend cu a pasa e dos teamnan di Taekwondo Aruba a train na ...

Aruba seleccion futbol CONCACAF U-15 y U-17

Seleccionnan nacional di Aruba ta participa den e torneo grandi di CONCACAF pa paisnan ...

Aruba junior campeon di baseball Latino Americano

Despues di 6 aña e baseball di Aruba ta regresa e Serie Mundial di ...