Naomi Osaka a demonstra creciente madurez derotando Victoria Azarenka den final di US Open, despues di cay atras seriamente den di promer set, pa asina reclama su di tres victoria den un Grand Slam.

Pa Osaka, di apenas 22 aña, esaki ta di dos titulo di US Open (1-6 6-3 6-3). Osaka a keda abruma den inicio di e partido y a cay atras 3-0 rapidamente pa perde cu un game so gana, y a cay atras atrobe den di dos set, pero a recupera pa gana 10 di e siguiente 12 gamenan pa logra cambia rumbo.

Azarenka, den su promer final grandi desde 2013, a perde su serve na 5-3, pa despues Osaka serve pa termina e set. Osaka a ripiti su supremacia den e set decisivo riba su segundo match point y a keda drumi un rato riba e cancha ta contempla cielo di New York pa disfruta su hazaña.

E victoria di Osaka a sigura Osaka, cu a gana US Open 2018 y Australian Open 2019, di mantene su record di a gana tur final di Grand Slam cu el a hunga te awor.

“Mi no kier hunga contra bo den otro final mas, mi no a realmente disfruta esey, e tabata realmente un bataya hopi duro pa mi,” Osaka a bisa Azarenka den forma chistoso.

Y el a añadi: “E tabata un inspiracion pa mi pasobra mi tabatin custumber di mira bo hunga tempo cu mi tabata mas hoben. Mi a siña hopi, danki pa esey anto.”

Osaka su victoria nobo na Flushing Meadows a bin dos aña despues di a derota Serena Williams den straight sets den un ambiente sumamente hostil, despues cu Williams tabatin su pleito formal cu umpire Carlos Ramos. El a laga un Osaka sin tanto experiencia na lagrima wardando riba su promer trofeo di Grands Slam. Cos no tabata por ta mas diferente awor; un Osaka hopi mas sigur den un Arthur Ashe Arena practicamente bashi.

 

LEAVE A REPLY

Please enter your comment!
Please enter your name here