Wimbledon lo paga $12.5 miyon den premio na 620 hungado a pesar di cancelacion di e torneo, segun All England Club a bisa ayera.

Despues di consulta cu su proveedor di seguro, oficialnan di e club a bisa cu 256 hungado, kende lo mester a competi den e main draw, lo ricibi 25mil libra cada un ($31mil) mientras 224 hungado kende lo a competi den clasificacion lo ricibi 12,500 libra cada un ($15,600).

“Inmediatamente despues di cancelacion di The Championships, nos a pone nos atencion bek riba con nos por asisti esunnan cu ta yuda haci Wimbledon un realidad”, segun hefe ehecutivo di All England Club, Richard Lewis a bisa.

Ademas, 120 hungado kende lo a competi den doubles lo ricibi 6,250 libra cada un ($7,800); 16 hungado cu lo a competi den rolstoel lo ricibi 6mil libra cada un ($7,500); y cuatro hungado cu lo a competi den quad rolstoel lo ricibi 5mil libra cada un ($6,200).

“Nos sa cu e lunanan di incertidumbre aki tabata hopi preocupante pa e gruponan aki, incluyendo e hungadonan, hopi di ken a enfrenta dificultad financiero durante e periodo aki y lo tabata corectamente anticipando e oportunidad di gana placa di premio na Wimbledon pasa riba nan rango mundial”, Lewis a bisa.

E pandemia a forsa oficialnan pa cancela e torneo pa prome biaha desde 1945.

“Nos ta contento cu nos polisa di seguro a permiti nos reconoce e impacto di e cancelacion riba e hungadonan y cu awo nos ta den un posicion pa ofrece e pago aki, como recompensa pa e trabou cu nan a inverti den construi nan rango na un punto unda nan lo a gana entrada directo na The Championships 2020”, Lewis a bisa.

E club tambe a anuncia cu e formula di ‘seed’ riba cancha di yerba, usa desde 2002, a ‘cumpli su termino’. Cuminsando na 2021, seeding pa e draw di singles masculino lo ta basa completamente riba rango, e club a bisa, pero no lo tin cambio den e metodo di seeding pa e draw femenino.

LEAVE A REPLY

Please enter your comment!
Please enter your name here