Abdullahi Abdulkadri, coordinado di e oficina di estadistica y unidad di desaroyo social di Nacionnan Uni den Caribe

Un grupo di organisacionnan trahando den comunidad conhuntamente cu departamentonan di gobierno a dialoga riba diferente topico pa loke ta trata desaroyo sostenibel na Aruba ayera atardi. A enfoca specificamente riba mas colaboracion entre organisacionnan tanto paden como pafo di gobierno. Ademas a toca e importancia di trece un ‘data culture’ na nos isla.

Den cuadro di e di dos bishita di Economic Comission for Latin America and the Caribbean (ECLAC) na nos isla, e comision a tene un reunion habri na publico ayera atardi na Piedra Plat Entertainment Center pa asina informa diferente organisacionnan den nos comunidad riba e desaroyo di Sustainable Development Goals (SDGs) na Aruba.

Esaki despues cu e comision aki tabata dialogando cu diferente instancianan den nos comunidad desde diadomingo pa asina atende cu e diferente metanan cu ta cay bou e 17 SDGs.

SDGs

Nos a mira hopi propaganda e ultimo añanan pa loke ta e SDGs, pero kico exactamente nan ta? E metanan aki cu a wordo estableci por medio di Nacionnan Uni kier yuda pa comunidadnan rond mundo combati problemanan compleho incluyendo pobresa, malesa, corupcion, instabilidad economico, inclusion social, desigualdad y acceso na educacion di manera practico. Aunke tur e metanan ta delinea separadamente, nan tur ta conecta pasobra hopi biaha por trata e problemanan di manera holistico.

Cada meta ta trata un aspecto di nos sociedad cu mester bira sostenibel riba nivel local como tambe regional pa asina contribui na un miho futuro pa tur hende humano rond mundo. Pues e metanan di esaki mester wordo trata por medio di colaboracion.

P’esey mes Abdullahi Abdulkadri, coordinado di e oficina di estadistica y unidad di desaroyo social di e Nacionnan Uni su oficinanan subregional den Caribe a bin pa di dos biaha na nos isla pa asina yuda trece un sistema integra y central di estadistica na Aruba.

Data y estadistica ta primordial pa midi progreso y desaroyo

E rol di data/estadistica pa loke ta trata e SDGs ta uno grandi. T’asina cu e intencion tras di e coleccion di data ta pa asina midi e progreso den cada un aspecto di e SDGs. Esaki no solamente tin su funcion na nivel local- esta pa nos sa unda nos ta para- pero tambe ta importante pa otro paisnan siña di otro y por colabora cu otro rond mundo.

Sr. Abdulkadri a tene un dialogo habri durante e atardi unda tur participante por a vocifera nan pensamentonan y preguntanan pa loke ta trata e SDGs. Nos a tuma nota di diferente persona cu tabata representando departamentonan di gobierno manera Zulema Dabian di Departamento di Asuntonan Economico, representantenan di Departamento di Labor y Investigacion y; Rachelle Tromp, coordinado di asuntonan internacional di Universidad di Aruba.

Pero tambe di parti di NGOs tabata presente personanan di Mary Joan Foundation, Clifford Rosa di Stichting Rancho, Richard van der Wal di TortugAruba y Hubert Dirksz di sindicato FTA, entre otro.

Cultura di miedo pa data

E discusion cu sr. Abdulkadri a fomenta tabata riba topico di e manera con data ta wordo colecta y wordo maneha na paisnan chikito manera Aruba. Sr. Abdulkadri a subraya cu semper pa paisnan chikito, particularmente riba ‘island states’, tin un cultura di miedo rond di e asunto di data. E ta haya importante pa personanan manera esnan cu tabata presente pa e evento publico di SDG Aruba bin cu mentalidad nobo pa trece coleccion di data den consenshi colectivo di comunidad.

Magaly Maduro di Fundacion pa Hende Muhe den Dificultad a subraya cu un aña pasa Bon Dia Aruba a pidi e fundacion data riba hende muhe cu a pasa den situacion dificil, cual nan tabata contento pa comparti. Sinembargo el a subraya cu nos como medio tabata sorprendi mirando e dificultad cu tin pa haya data riba cualkier tema.

Sr. Abdulkadri a splica cu den organisacionnan, particularmente gubernamental, hopi biaha no ta publica data pasobra e data aki ta wordo uza internamente den e departamento solamente. Of te hasta den caso di polis, data ta wordo colecta pero no tin ningun hende cu ta haci algo cu ne pues esaki ta keda den cashi. “Polis por ehempel ta den e negoshi di aplica ley, no di coleccion di data. Pero si bo lo a tin un hende pasiona pa data y comunicacion den e cuerpo, e ora ey posiblemente esaki lo por trece un cambio di e manera cu e data ta wordo uza.”

Bon Dia Aruba a cuestiona dicon data cu ta wordo colecta di parti di gobierno uzando recursonan di pueblo no ta wordo publica bek pa e pueblo por tira bista riba esaki. Sr. Abdulkadri a splica cu tin biaha e no ta simplemente cu e departamentonan no kier duna data, si no cu e publico tampoco ta pidi pa e data. P’esey e ta haya cu pueblo mester cuminsa haci preguntanan pasobra ‘ora bo tin mas hende ta puntra pa data of cu ta critico mas lo tin presion pa e departamentonan duna acceso na esaki’.

Sinembargo sr. Abdulkadri no a descarta cu e manera con data ta wordo trata actualmente den hopi ‘small island states’ ta manera si data ta placa cu bo tin di wanta na dje, mientras data ta algo cu ta mas valioso ora e wordo comparti.

Un organo pa centralisa tur data

E palabracionnan cu sr. Abdulkadri a tene cu diferente departamento di gobierno ta conduciendo na e posibilidad di trece un punto central unda tur e data lo por wordo colecta. Aunke e rol aki actualmente ta pa Oficina Central di Estadistica (CBS), el a wordo informa cu e departamento no tin suficiente trahado pa haci e trabou complica di trece tur data bou un dak. E importancia di data te hasta ta bay asina leu cu sr. Abdulkadri a bisa si bo no tin data, e ora ey bo no por sa cua ta e gruponan den sociedad cu ta perhudica. Por ehempel pa haya sa si hende muhe ta gana menos cu hende homber pa e mesun trabou y cuanto, en caso cu si.

Henter e asunto di data y e retonan social cu paisnan manera Aruba ta comparti cu otro islanan den Caribe pa via di e enfoke intenso riba desaroyo economico y turismo. El a subraya cu tin hopi cosnan en comun entre e nacionnan Caribe.

David Quant, vocero di Parlamento Hubenil

Mas colaboracion pa trece solucion na desempleo hubenil y otro asuntonan

Na mes momento David Quant, vocero di Parlamento Hubenil a expresa e importancia di e SDG number 17, cual ta encera mas cooperacion entre organisacionnan.
El a duna un ehempel di tempo cu representantenan di organisacionnan hubenil di Hulanda a tene contacto cu diferente organisation nan di hoben aki na Aruba pa haya sa kico ta e retonan cu hobennan ta enfrenta na Aruba. Hunto nan a constata cu e problema di desempleo bou hobennan ta grandi,  aunke tin hopi instancianan cu ta trahando riba e tereno aki.
E hoben a duna ehempel di e programanan manera di Mariniers Kazerne pa dropouts, y programanan na enseñansa pa empleo. “Nan tur ta trahando riba e mesun meta pero e problema ta cu nan no ta trahando hunto. Te hasta tin instancianan cu ta trahando den un rango di un SDG pero no ta na altura di esaki. Pues e rol di e SDGs mi ta kere ta pa trece mas conciencientisacion y colaboracion pa asina logra e metanan di un manera mas eficiente.”
Den e otro palabra, e hoben ta sinti cu trahando hunto nos por logra mas y ta mas efectivo pa locual ta trata logrando e meta nan di SDG. Al fin al cabo, pa logra cualkier di e 17 meta nan, colaboracion ta di vital importancia, segun sr. Quant.

Na final no ta cla ainda ki tempo lo bin cu un sistema centralisa di estadistica na Aruba, pero sr. Abdulkadri ta spera cu e lo bin pronto. Alabes Diana Croes di HopeAruba Movement a expresa cu e mentalidad pa loke ta trata data na Aruba mester cambia, pero e cambio lo mester bin di cada un di nos individualmente.