Dia 20 di november ta Dia Internacional di Derecho di Mucha. Pa duna contenido na e conmemoracion aki, Bureau Sostenemi y fundacion RespetaMi hunto cu otro partner a lansa pa di dos aña consecutivo nan actividad Derecho di Mucha ta Conta.
Sra. Yolanda Leslie di fundacion Respetami a bisa den presencia di minister Paul Croes, cu e aña aki nan a surpasa e cantidad di inscripcion. Ta asina cu cantidad di 1152 alumno di scol preparatorio a join cu e campaña aki cu ta e dobel di e muchanan di aña pasa.
Actividad
Den e actividad aki ta participa full e klas cu su juffrouw of meneer. Pa ehempel, SKOA tin 15 scol preparatorio y di nan nuebe a inscribi cu un total di 21 klas y 527 alumno.
“No ta asina cu un grupo chikito di e klas ta envolvi, sino cu full e klas mester wordo envolvi”, sra. Leslie a bisa. E premionan lo ta dirigi riba full e klas. E biaha aki nan tin cuater categoria: 1. Cantica of poesia; 2. Collage 3. Un obra di man; y e delaster categoria ta un stage of un video. E biaha aki e fundacionnan lo ta mas envolvi den e desaroyo di e actividad aki. E deadline lo ta 11 di november. E hurado lo consisti no solo di adulto pero tambe di hobennan.
Haciendo uzo di e blachinan di un mata di druif, nan a pone como fruta di e mata aki cada un di e derecho di mucha cu cada klas di e scol preparatorio cu ta participa mester traha riba dje.
Durante un conferencia di prensa cu a tuma luga ayera tardi na Flora Market a wordo duna tur informacion na tur scol basico cu ta participa y instancianan cu ta trahando riba tereno social. E aña aki, sra. Daphy Tecklenborg di Bureau Sostenemi, a bisa cu den cuadro e di dos version di nan actividad “Derecho di Mucha ta Conta” nan a percura pa envolvi mas muchanan na nivel di Kleuterschool.
Nan a haci esey cu hopi di e kleuterschool a indica cu no tabatin mucho actividad riba e fecha di Dia Internacional di Derecho di Mucha.
Sra. Tecklenborg a bisa cu nan bureau ta pensa cu for di chikito mester cuminsa papia cu e menor di e klas aki riba kico ta su derechonan pa nan ta consciente di dje. Asina ora cu e mucha ta bira un adulto e sa kico ta su deber cu tin pa ofrece e mucha. Nan ta e mesun derechonan cu el a disfruta di dje, ora cu e tabata chikito.
Minister Paul Croes a bisa cu e campaña di prevencion di abusonan di mucha ta un tema cu cada biaha ta wordo treci dilanti como uno di preocupacion den nos comunidad. Ta asina cu nan a cuminsa cu e campaña #StopAwo abuso di mucha riba medionan social. Un campaña cu a bira viral, ya cu hopi hende a sostene y nan a condenan cualkier tipo di abuso di mucha sea fisico, sexual, emocional y pa medio di negligencia.
