E actual debate politico tocante e propuesta di ley di supervision financiero no ta brinda mucho claridad di contenido y varios punto di interes general no ta haya splicacion debido.

P’esey redaccion di Bon Dia Aruba a reuni un serie di punto cu na nos parecer ta importante pa tuma na cuenta, cu no ta asunto di opinion pero e hechonan cu publico mester paforma nan propio opinion.

  1. Supervision financiero a keda imponi na augustus 2015 a traves di e ley di Aruba (Landsverordening Aruba financieel toezicht; LAft). Via e ley aki a keda estableci e supervision riba e proceso di maneho financiero di parti di Conseho di Ministro di Reino, e maximo autoridad dentro di Reino.
  2. E supervision ta trata principalmente e control, di antemano y posterior di tur ley di presupuesto y ley di cambio di presupuesto di Aruba.
  3. Parlamento di Aruba ta keda cu derecho di amienda y aprobacion di tur propuesta di ley di presupuesto. Esaki ta mantene e asina yama ‘budgetrecht’.
  4. E cuadro di supervision menciona ariba ta copia similar, no identico, di e ley di supervision di Corsou y Sint Maarten.
  5. CAft: E colegio di supervision y asesoria, den cual tin representante di gobierno di Aruba, ta vigila e proceso na nomber di Conseho di Ministro di Reino, pero no tin poder corectivo den cuadro di e supervision. Si ta constata necesidad di recomenda accion di Conseho di Ministro di Reino, CAft ta autorisa pa haci proposicion.
  6. E propuesta di ley di Reino den debate actualmente (HOFA: ley di finanzas sostenible pa Aruba) no lo ta inicio di e supervision di Conseho di Ministro di Reino’; esey ta existi desde 2015 caba den e ley di Aruba di supervision.
  7. Den e propuesta nobo e cuadro legal di supervision, actualmente ancra den e ley di Aruba, lo pasa pa e ley di Reino pa su mayor parti.
  8. Un parti menor lo pasa pa e ley di Aruba, entre otro norma di presupuesto.
  9. Si parlamento no aproba e ley di Reino, e ley di Aruba ta keda vigente y asina lo continua e mesun supervision financiero, incluyendo e papel di CAft y di Conseho di Ministro di Reino, cu ta describi y inclui den e ley di Aruba.
  10. E normanan pa futuro pa finanzas publico ta hinca den e ley di Aruba; esey a tuma lugar na fin di 2023 y na vigor desde 1 di januari 2024, en vista cu e ley di Reino no a keda cla manera planea.
  11. No aprobacion di e ley di Reino den parlamento di Aruba lo significa cu no tin consenso y cu lo no tin ley di Reino (di consenso). Consecuencia lo ta cu e interes riba e prestamonan Hulandes no ta baha segun e acuerdo cu gobierno Hulandes.
  12. Tampoco ta haya prestamo Hulandes na interes reduci pa reemplaza debe internacional cu ta madura y mester refinancia.
  13. Parlamento di Aruba por aproba cambio den e ley di supervision di Aruba. Sin embargo, pa un ley bin na vigor, ta necesario e ratificacion pa Gobernador y un o mas ministro responsable. Cambio den e ley di supervision cu ta afecta e supervision di gobierno di Reino por encontra obhecion di banda Hulandes cu por resulta den no ratificacion di e ley pa e representante di Rey (Gobernador).