Dia 20 di november, Aruba lo bolbe pone atencion riba e bienestar y e derechonan di e mucha y hobennan di e isla. E fecha aki ta marca tanto e Dia Internacional como Nacional di Derecho di Mucha, como tambe e 26 aña di existencia di Fundacion Telefon pa Hubentud Aruba, 131 Aruba, e linea di ayudo y apoyo pa hubentud na e pais

Shurman Milliard, trahado social na Telefon pa Hubentud Aruba, a splica cu tur aña 131 Aruba ta traha den colaboracion cu scolnan, entidadnan gubernamental y partnernan social pa promove e derechonan di mucha na nivel nacional. E entusiasmo di e mucha, docente y mayornan ta demostra cu e tema ta biba den comunidad. El a remarca cu november no ta solamente un dia di celebracion, sino un luna completo di actividadnan dedica na proteccion y empoderacion di hubentud Arubiano.

El a indica cu e aña aki seis scol a ser selecciona pa participa directamente den sesionnan di conscientisacion cu 131 ta duna. Trahadonan social di 131 ta bishita e scolnan pa duna les den klas tocante e derechonan di mucha y con nan por proteha nan mes. Durante e bishitanan, e muchanan ta ricibi bukinan educativo splicando e derechonan di mucha E sesionnan ta stimula discusion y reflexion den klas, promoviendo respet, empatia y responsabilidad.

Milliard a subraya cu e entusiasmo den scolnan ta sigui crece tur aña. Loke a cuminsa como un proyecto chikito, awor a bira un campaña nacional cu ta yega hopi hende. E cooperacion entre 131 Aruba y e scolnan ta garantisa cu tur mucha y hoben tin acceso na informacion sigur y confiabel di con pa busca ayudo ora mester.

El a sigui splica cu e actividad principal riba 20 di november ta “Get the Message”, un iniciativa creativo diseña pa laga e tema di derecho di mucha bira algo bibo y relevante. A traves di peliculanan cortico (short movies), dialogo y arte visual, e muchanan ta siña tocante nan derechonan. E peliculanan aki, disponibel riba e canal di YouTube di Telefon pa Hubentud, ta mustra situacionnan real cu por pasa den bida di un mucha.

E material visual aki ta un metodo nobo pa docentenan pa duna les den manera cu ta capta atencion di e mucha y hoben. Un di e scolnan lo tin e oportunidad pa bay cine y wak e peliculanan riba pantaya grandi, un evento special cu ta añadi entusiasmo y participacion comunal.

Milliard a splica cu e aña aki nan a realisa un iniciativa adicional. Aunke e trabou di 131 Aruba ta dirigi principalmente na muchanan, e organisacion ta compronde cu docentenan tin un rol fundamental den formacion di e futuro generacion. Pa motibo ey, mas cu dies docentenan a participa den un tayer special pa fortifica nan conocemento tocante e derechonan di mucha y pa integra esey den nan enseñansa di tur dia.

E formacion aki ta garantisa cu e mensahe di 20 di november no keda den celebracion so, sino cu e ta sigui den tur luna di e aña. Docentenan ta bira vocero di e derechonan di mucha y ta yuda pa crea un generacion mas conscientisa y comprensivo.

Kimberly de Cuba, trahado social na Fundacion Telefon pa Hubentud Aruba, a splica cu 131 Aruba ta conoci principalmente pa su servicio di telefon, email y chat, cu ta duna apoyo confidencial na mucha y hoben cu tin mester. Pero su papel ta mucho mas amplio: durante e 26 aña di existencia, 131 a bira un columna fundamental den e sistema di apoyo social di Aruba, ofreciendo educacion preventivo, conseho, charla, tayer y training pa hoben y adulto igualmente.

E servicio ta disponibel no solamente pa e mucha y hoben, sino tambe pa docenten, mayor y profesionalnan cu ta traha cu mucha. Pa medio di informacion y orientacion, 131 Aruba ta yuda preveni problema den su fase inicial, promove comunicacion y confiansa.

Scolnan di Aruba ta un di e aliadonan principal den e mision di 131 Aruba. A traves di charla, proyecto y actividadnan educativo, hopi tema como bullying, seguridad digital y bienestar emocional ta ser trata den manera constructivo. Hopi conflicto y situacion dificil a logra ser preveni danki na e cooperacion aki.

De Cuba a indica cu den cuadro di e celebracion di e Dia di Derecho di Mucha y e di 26 aniversario di 131 Aruba, un total di 53 scol lo lanta e bandera di 131 Aruba riba 20 di november. E acto simbolico aki ta representa union, gratitud y compromiso pa sigui traha man den man cu 131 pa un futuro mas sigur pa tur mucha.

El a sigui splica cu aparta di esaki, spirito di unidad lo ta visibel den tur caminda. Pa honra di e fecha special y e aniversario di 131 Aruba, 25 rotonde rond e isla — for di San Nicolas te Noord — lo hisa e bandera di 131. E banderanan lo keda na luga for di 20 te 27 di november, como recordatorio visual cu Aruba ta uni den proteccion di mucha y hobennan di e isla.

E iniciativa aki ta sirbi pa motiva mayor y cuidadornan pa ta consciente cu ayudo ta existi y cu 131 Aruba ta un recurso seguro y confiabel. E mensahe ta cla: e bienestar di mucha ta responsabilidad di tur hende.

De Cuba a enfatisa cu un di e aliansanan mas importante di 131 Aruba ta cu e mayornan mes. El a splica cu aunke 131 ta ofrece orientacion profesional, e organisacion ta reconoce cu e prome educador den bida di un mucha ta su mayor. Pa e motibo ey, 131 Aruba ta enfatisa comunicacion abierto entre mayornan y yiu, y ta motiva nan pa busca ayudo ora necesario.

Pa hopi mayor cu ta traha, ta dificil pa tin semper tempo. 131 Aruba ta sirbi como un aliado confiabel, ofreciendo guia y sosten na momento cu e no por t’ey pa su yiu door cu e ta labora, por ehempel y por dirigi su yiu pa tuma contacto cu 131.

131 Aruba ta mira atras cu orguyo riba 26 aña di servicio continuo. Loke a cuminsa como un liña di ayudo chikito, awor ta un sistema amplio di apoyo pa hubentud. Su impacto ta ser sinti den scol, cas y comunidad, promoviendo cambio positivo y cultura di respet.

E aniversario aki no ta solamente un motibo pa celebra, sino un yamado pa sigui fortalece colaboracion. 131 Aruba ta expresa su gratitud na tur partner cu ta sigui contribui pa proteha e muchanan di Aruba. Tur aliansa ta fortifica e red di cuido cu ta sostene nos hubentud.

Cu un spirito di progreso y speransa, 131 Aruba ta mira pa futuro cu meta di sigui amplia su servicio y fortalece su relacion cu e comunidad. E organisacion ta soña cu un Aruba unda cada mucha ta sinti sigur, scucha y balora.

For di klas te riba rotonde, for di mayornan te docentenan, e mensahe di 20 di november ta cla: e derechonan di mucha ta asunto di tur hende. Cu iniciativa manera ‘Get the Message’ y cu e dedicacion di 131 Aruba, Aruba ta sigui sirbi como ehempel di un comunidad cu ta inverti den su futuro generacion.