Stichting Bevolkingsonderzoek borstkanker (BOB) Aruba ta haya cu e motibo pakico ainda 14.300 hende muhe cu no a bin haci nan test di control of mammogram a pesar cu nan a wordo invita ta varia. A pesar di esaki, e fundacion aki ta satisfecho cu un 35% di e 24 mil hende muhe entre 45 y 75 aña di edad registra den AZV a acudi pa chekeo di nan pecho. Den e invitacion cu nan a haya ta poni cu nan por haci nan mammogram na e fundacion aki na un fecha specifico y un orario.

Director di e fundacion, Enrita Werleman a laga sa cu for di maart 2016 ora cu nan a start cu e campaña di prevencion aki, 8500 hende muhe a acudi pa haci nan chekeo. E grupo aki a haya e campaña aki fantastico ya cu di un banda nan no mester paga; tampoco nan no mester di un verwijsbrief pa haci e test aki, sin mester bay hospital.

Sinembargo ainda ta pendiente di e test aki un 65% di hende muhe sigura pa AZV y cu ta cay den e edad pa bin controla nan pecho. Un total di 1200 hende muhe cu a wordo invita a cancela nan cita. Un di e motibonan por ta cu ya nan ta pashent di cancer na pecho y nan ta hayando tratamento. Tambe tin e aspecto cu algun di nan a haci nan mammogram caba di cada dos aña na hospital. Un otro factor cu ta hunga rol ta cu hopi di nan no a haya e invitacion manda via post na nan cas, ya sea cu e adres no ta cuadra of gewoon e no a yega nunca.

Miedo
Sinembargo sra. Werleman a laga sa cu un gran parti di e hendenan cu no a haci e test aki ta pa motibo cu nan tin un of mas miedo. Nan mester bataya contra miedo pa dolor cu e presion di e mashin ta haci. Pero tambe miedo pa e resultado. Tin hende muhe cu ta opta pa bay haci nan test ora cu ta sinti dolor of ora cu nan tin un pipita. “E mentalidad di prevencion tampoco no t’ey ainda. E ta un cos cu mester crece cu miho ta preveni pa un malesa asina cu por wordo detecta tempran. Cu despues lamenta cu nos tin cu tuma tratamento pisa pafo di Aruba. Esey ta nos lema”, el a bisa.

Otro miedo cu e hende tin ta cu e mashin ta traha cu X-ray y e por causa cancer. Fundacion aki ta purba di kibra e miedo aki ya cu tur rond di nos tin radiacion di X-ray. El a trece como ehempel cu si nos ta biaha di Aruba pa Hulanda nos ta haya mas X-ray cu loke e persona ta haya den un par di seconde cada dos aña cu e mester haci e test.

Tin hende muhe cu a haci cirugia plastico di nan pecho. Nan ta kere cu door cu nan tin protesis nan no por haci e test aki pa evita cualkier problema. Sinembargo esaki no ta berdad, segun sra. Werleman; nan ta tene cuenta cu esaki. Hende muhe tin cu sigui haci e test aki a pesar cu nan tin protesis pa haci mas bunita. E pecho su tehido a keda mescos, y mester tene cuenta cu mientras edad ta subi e risico tambe ta subi tambe.

Invitacion
El a informa cu den cuadro di nan campaña di prevencion, Stichting BOB ta cuminsa invita e grupo di 14.300 hende muhe cu no a bin haci nan test. E ta recomenda cu nan por yega cerca Stichting BOB anytime situa den e mesun edificio di Ibisa (Frankrijkstraat 1) for di 8or di mainta te cu 4or atardi. Tambe nan por yama na telefon: 588-1212, y nan ta habri pa brinda nan servicio y ayudo. Te hasta pa esun cu no tin transporte, e fundacion a haya ayudo di un gym pa cu esaki; specialmente pa e personanan di Santa Cruz y Noord. Por traha un cita yamando Stichting BOB y nan ta percura pa un hende bay busca nan. “Tur manera tin moda pa bo yega akinan. No tin excuus pa bo no haci bo mammogram”, e directora a bisa.