AVP – Mas cerca di comunidad

Nos a drenta aña electoral 2017 y ya caba por mira algun partido preparando pa subi caya y campaña. Varios partido ta cla y a cuminsa caba mientras cu otronan ta den nan ultimo fase di preparacion. Nos a acerca e diferente partidonan cu ta bayendo eleccion y lo ta siguiendo nan pasonan durante e proceso electoral compartiendo cada desaroyo cu presenta. Awe nos ta cuminsa cu e partido den gobernacion Arubaanse Volks Partij (AVP)

AVP – Mas cerca di comunidad
Lider di fraccion AVP sr. Marlon Sneek ta conta nos cu nan a start cu campaña caba. Nan a cuminsa cu actividad na December 2016 riba Green Square cual segun Sneek tabata e prome actividad pa “grease” e motor berde. For di eynan a sigui pa Ayo unda cu eleccion pasa nan partido tambe a organisa un actividad. “E tabata un bario caminda cu sigur nos a gana un bon teritorio. Pa medio di un cas di partido asina bo ta mas cerca di comunidad y organisa anochinan di informacion caminda cu bo ta trece e informacion pa pueblo.” Sr. Sneek ta señala cu social media manera Facebook mas y mas a cuminsa domina anto hopi bes tin hopi mal informacion cu ta bay afo via e medionan aki.  “Si no coregi esakinan na tempo bo ta haya bo ta core tras di e hechonan. P’esey pa nos e temporada aki ta importante pa ta mas cerca di comunidad pa por contesta cual pregunta of preocupacion cu por tin.”

Dos fundacion preparando informacion
Accion na Tanki Leendert tambe a cuminsa como tambe a drecha e cas di partido na San Nicolas algun siman atras.  Cas di partido na Dakota tambe a cuminsa haya su beurt pa haci limpi y verf e bek.  “Nos ta butando tur cos den nan luga pa asina ta ey’fo constantemente dunando e informacion, splicando pueblo kico ta locual bo a haci y kico lo ta e siguiente fase.” E partido tin dos fundacion: Digna Lacle Hererra y Fundacion Vesca. Digna Lacle Hererra ta e fundacion cu ta percura pa tin formacion di nan candidatonan. Vesca ta e fundacion cientifico di Avp cu ta percura pa tin e documentonan pa loke ta e siguiente direccion pa tuma na pais Aruba; finansas publico, enseñansa, turismo etc.  Sneek: “E organisacionnan aki ta den full swing pa por tin e producto final ey cla. Pa ora cu nos cuminsa cu e parti campaña hopi mas deep, cu esaki nos ta splica comunidad kico nos ta bay presenta y haci den e siguiente cuater aña.”

Bishitanan riba caya
“Te aworakinan e bishitanan cu nos tabata tin, nos no a haya e parti di onsportief of hendenan cu porta ta agredi bo. Nos mester bisa cu nos ta bon bini te ainda na tur caminda cu nos a cuminsa bishita,” sr. Sneek ta bisa.  E ta sigui bisa cu pa Avp e cos di mas importante ta, a pesar cu bo gusta of no gusta e partido, tur hende por mira kico e fraccion a haci den su gobernacion. “Tur hende ta core riba e caminda Green Corridor. Nos por mira e critica cu tin awe pasobra tin hopi caminda cera door di e mesun construccion aki. Tur hende por mir’e. Tin un brug cu nan ta bashando, scolnan cu ta den construccion, un hospital cu ta den mehoracion y un waf cu a muda. Tur hende awe sa exactamente unda e florin cu nan a hinca den impuesto a bay.”  Sneek ta sigui agrega riba por ehempel cu a duna atencion na e famianan di menos recurso, esnan cu ta cobra pensioen a haya dos aña tras di otro un aumento 2.5%, salario minimo tambe a conoce dos aña tras di otro un aumento. Sneek: “Nos a atende cu KIA, polis, imigracion y na caminda douane atendiendo cu nan posicion huridico pa garantisa cu nan kadernan ta bon reparti y cu nan ta haya di berdad nan beneficionan rekeri. Kiermen ta un gobierno cu a atende tur punto. Claro ta un florin bo tin anto bo tin cu wak con pa reparti esaki. P’esey nos semper ta bisa cu nos ta na altura di tur e problemanan, pero duna nos e espacio y tempo pa por atende cu tur cos.”  E accionnan riba caya ta bay continua y bira mas grandi den e siguiente siman y lunanan nos dilanti segen sr. Sneek.

Video di entrevista cu sr. Marlon Sneek