E dia nacional mas importante di Aruba ta dia di Himno y Bandera. E aña aki Aruba ta celebra 40 aña di Himno y Bandera y 30 aña di Status Aparte.
18 maart ta e dia cu a scoge pa celebra himno y bandera di Aruba, pasobra durante Mesa Rondo na Hulanda riba e fecha ey na aña 1948 pa prome biaha a entrega un mocion na Su Mahestad Reina Juliana, cu ta boga pa autodeterminacion di e pueblo Arubano. E delegacion Arubano tabata bou di liderazgo di Shon A. Eman y 2147 Arubiano a firma e peticion aki.
Gilberto François “Betico” Croes como politico a dedica su mes mas tanto pa e derecho di auto determinacion di e pueblo Arubano. Despues cu Hulanda a nenga pa negocia na januari 1976 tocante un luga apart di Aruba denter di Reino Hulandes, Betico Croes a indica cu lo declara independencia unilateralmente na maart 1981. Pa fortalece e consciencia nacionalista, riba su proposicion e bandera di Aruba y himno di Aruba propio a keda instala como simbolonan di identidad durante un manifestacion den Stadion di Wilhelmina na Dakota riba 18 maart 1976.
Mientras cu ta hisa e bandera Arubano pa prome biaha den Stadion Wilhelmina, e coro di Maybeline Arends Croes riba acompañamento di orkesta filharmonico di Aruba bou di guia di e musico conoci Joy Kock, a canta e composicion, un wals di Padu Lampe y difunto Rufo Wever “Aruba Dushi Tera” como e himno Arubano. Pueblo Arubano tabata masalmente presente pa duna e Bandera y Himno su honor.
Bandera di Aruba
E bandera di Aruba a keda introduci oficialmente riba 18 di maart 1976, hunto cu e himno oficial “Aruba Dushi Tera’. Desde cu Aruba a haya su Status Aparte riba 1 di januari 1986, loke ta encera cu Aruba a bira un pais autonomo den Reino Hulandes, e bandera a bira e bandera di Pais Aruba. E bandera di Aruba tin 4 color, geel, blauw, blanco y cora.
- Blauw ta nifica e lama inmenso cu ta rondona Aruba. E color di fondo di e bandera ta blauw cu e code Pantone 279C.
- Geel ta colo di abundancia y e liñanan horizontal ta representa e solidaridad di esaki. Geel tambe ta simbolisa e industria actual y turismo como fuente di entrada mas importante, mescos cu oro y industria di aloe for di e pasado industrial. E colo geel di e liñanan ta Bunting Yellow. E colo ta para tambe pa e palonan y e matanan di Aruba cu ta floria geel, manera Kibrahacha, Brazil, Bonchi di Strena, curahou, tuturutu y wanglo.
- Blanco ta simbolisa e playanan blanco manera sneeuw y e puresa di e pueblo Arubano.
- E strea (blanco/cora) ta representa e cuater puntonan di un compas y ta simbolisa e origen di e poblacion for di tur skina di mundo. Ademas e ta representa e industria bieu di palo di Brazil y tambe como un homenahe na e sanger indjan, cu den Rooi Frances (Franse Pas) a basha pa e libertad di Aruba. E cora di e strea ta Union Jack Red.
