E siman aki, minister di Finanzas, Asunto Economico y Sector Primario, mr. Geoffrey Wever (Futuro) tabata presente na ceremonia oficial di graduacion di e Basisopleiding Belasting, un trayecto formativo intensivo dirigi na profesionalnan di Departamento di Impuesto.
No menos cu 26 empleado a finalisa cu exito e programa cu a cuminsa na october 2024 y a conclui na december 2025. E graduadonan a sigui e opleiding tres biaha pa siman, despues di nan ora regular di trabou, demostrando un compromiso extraordinario cu profesionalisacion y mehoracion continuo.
Den su discurso, Minister Wever a comparti su pasion pa e tema di derechonan fiscal y a subraya cu colecta di entradanan no ta solamente un mecanismo tecnico pa recauda fondo, sino un pilar fundamental pa sostene finanzas publico solido y sostenibel.
Minister Wever a enfatisa cu e rol di un fiscalista ta exigi mas cu solamente dominio tecnico. E ta exigi pasion pa e profesion, sensibilidad humano y capacidad pa aplica ley na un manera servicial.
Minister Wever a subraya cu gobierno ta sigui inverti den mehoracion di proceso, incluyendo digitalisacion y sistema online, cu lo contribui na un maneho mas eficiente y transparente di impuesto. Segun Minister Wever, capacitacion continuo di personal ta esencial pa adapta cu e evolucion tecnologico y cambionan den regulacion fiscal.
Minister Wever a expresa su gradicimento na Sra. Luenne Gomez-Pieters y su team pa organisa e Basisopleiding Belasting.
Cu e graduacion aki, Gobierno ta reafirma su compromiso cu fortalecemento institucional, profesionalisacion di servicio publico y consolidacion di un sistema fiscal moderno cu ta beneficia tur ciudadano di Aruba.
