Mexico: 23 curpa haya den tres luga na Xalisco, Nayarit

A haya 23 curpa, na tres luga di municipio Xalisco, den estado occidental Nayarit, asina familiarnan y agentenan di e Fiscalia local a informa. Tabatin 19 curpa completo y 4 cu no tabatin cabes. E dos luganan di hallazgo cu a descubri dialuna pasa, ta na municipio Xalisco, na costa Pacifico di Mexico.

Anteriormente, diasabra pasa, ya a topa cu otro luga di entiero comun na Xalisco, unda a haya nuebe cadaver. Pa falta di conoce e saldo oficial, e conteo di prensa Mexicano ta varia entre 20 y 32 curpa haya den un espacio di 48 ora, segun varios reporte.

E fosanan ta localisa na comunidad di Pantanal y ta apenas 100 metro di otro. E prome a wordo haya dia 13 di januari despues cu un grupo di campesino cu tabata traha den un cultivo di bacoba a haya un holo fuerte y a avisa Familias Unidas, un organisacion di familiar di hende desapareci. E buskeda a cuminsa cu apoyo di autoridadnan local, cu a uza cacho pa busca e curpanan. E investigacionnan a continua dialuna pasa, cu hallazgo di e dos ultimo luganan. Expertonan ta trahando den e zona pa determina causa di morto.

Autoridadnan tin temor cu por haya mas curpa dera di forma clandestino, y e labornan di buskeda ta continua den e area. E presidente di Familias Unidas, cu a prefera di no revela su identidad, ta menciona e cifra di 306 persona desapareci na Nayarit desde 2017, di acuerdo cu declaracion na e corant El Financiero.

E registro nacional di persona desapareci tabata conta te october pasa 143 persona cu no a wordo localisa. E colectivo Familias Unidas ta agrupa como 180 famia y a wordo forma na mita di aña pasa, memey di un ola di desaparicion forsa den e estado, entre juni y augustus 2017. 

Nayarit ta un estado entre Sinaloa y Jalisco, teritorio di e dos cartelnan grandi cu ta controla trafico internacional di droga desde Mexico: esun di Sinaloa y esun di Jalisco Nueva Generación. Na maart aña pasa a experimenta un aumento drastico di violencia, despues di e aresto di e fiscal Edgar Veytia El Diablo, deteni na California y acusa di ta pertenece na un red di trafico di droga.