Aña pasa el a tuma luga di manera virtual pa motibo di pandemia y e aña aki, nan ta spera e participacion di mil persona y atletanan internacional.

Asina William Erasmus, ken ta fungi como hefe suplente di Sport en Beweging, a menciona ayera mainta durante un conferencia di prensa di IBiSA, unda ademas el a informa cu Aruba International Half Marathon lo ta e apertura di ‘One Healthy Day’, cu ta trata di un dia completo di actividadnan fisico, deporte, movecion y salud.

One Healthy Day lo tuma luga dia 20 di maart, unda cu ta bay tin actividadnan ful rond di e isla di manera gratis. Durante esakinan, hende por purba di haci diferente actividad como yoga, training, bailamento, deporte, entre otro. Pa participa den esaki por subi riba e website www.onehealthydayaruba.com

Manera ta conoci, e marathon aki a keda cancela pa dos aña pa via di pandemia di Covid-19. Na e momentonan aki debi na flexibilisacion di medidanan y di casonan activo cu ta bahando, Aruba International Half Marathon ta back pa e dia 20 di maart, unda cu e punto di salida lo ta Joelaveist Sport Park di San Nicolas y e careda lo finalisa na Alhambra.

E actividad aki ta consisti di un competencia individual di Half Marathon di 21 kilometer. E aña aki segun Erasmus a sigura, nan ta introduci un categoria nobo cu ta e duo, caminda dos participante ta core 10.5 kilometer cada un. Ademas tin otro categoria como corporativo y relay di cuater persona, cu ta exigi cu e cuater participante mester ta di e mesun organisacion of compania pa asina por participa. Tambe tin studiante relay di cuater participante, na unda tur di nan ta core 5.25 kilometer cada un.

E relay di dos persona manera Erasmus a bisa ta dirigi pa personanan di 17 aña bay ariba y studiante relay ta di 12 aña bay ariba. Pa e parti corporativo y individual ta dirigi pa personanan di 18 aña bay ariba.

E registracion ta bay tuma luga di diferente manera, unda cu personanan por hacie di forma online registrando y pagando di forma virtual. Tambe por pasa na edificio di IBiSA for di 8or di mainta te cu 4or di atardi y paga cu placa cash of tambe por registra na Patrishi Sports for di diamars te diasabra di 10or di mainta te cu 6or di atardi.

Pa loke ta trata e careda, Erasmus a señala cu participantenan lo ricibi un medaya di finalista, un t-shirt dry fit y durante e careda, e organisadonan lo pone puntonan di hidratacion. Na final tambe nan lo ricibi un pakete cu nan medaya, fruta y tambe un sopi pa finalisa e actividad.

E biaha aki door cu pandemia ta disminuyendo, Erasmus a informa cu nan a dicidi haci e ceremonia di premionan na Alhambra despues di e careda, caminda cu nan tambe lo purba di evita aglomeracion, unda cu participantenan por pasa y busca nan premio.

“Caminda cu toch nos por premia nan y duna nan e balor ey despues di e careda di biaha, pero purbando di evita aglomeracion”, el a bisa.

Lo un participacion di 1.000 participante, y lo duna na tur di nan un oportunidad di por registra y paga pa e careda for di dia 15,16 y 17 di maart. Despues di e tres di dianan aki nan lo habri e registracion atrobe si ta necesario of si nan no a logra sell out. Den caso cu nan lo no sold out, e registracion lo keda habri te dia 17 di maart of te ora nan completa e mil participante.

Erasmus tambe a comenta cu manera tur aña nan tin e package pick up di e careda cu lo tuma luga na Alhambra e dia 19 di maart for di 9or di mainta te cu 3or di atardi, unda tur coredo y ekiponan por pasa pa busca nan pakete di e coremento.

Pa e dia 19 tambe nan lo tin e briefing pa e relay, y pa esaki Erasmus a menciona cu ekiponan mester keda pendiente pa despues di e registro nan haya un e-mail cu informacion di unda esey ta bay tuma luga y e orario di esaki.

Erasmus tambe a trece dilanti cu nan ta bay pone disponibel busnan for di 4or di mainta cu lo facilita e transporte di e participantenan for di Alhambra te Joelaveist Sport Park, pa asina nan por asisti na e careda. Igualmente ta bay facilita e transporte pa ekiponan di relay pa nan stacionnan of pick up despues cu nan caba cu nan careda y trece nan na e luga di finish.

“Semper nos ta promove – of aworaki mas cu nunca nos ta promoviendo – e parti di Covid-19. Ora cu lo subi den e busnan e participantenan mester haci uso di tapaboca. Y tambe nos lo start e careda den dos wave, unda esunnan individual lo start prome y despues relay team lo start despues”, el a declara.

Ademas, el a confirma cu nan ta bay enfoca hopi riba e fluho di e careda durante y na final di e actividad pa asina evita aglomeracion di hende.

E premionan a keda mesun cos cu añanan anterior. Nan tin e top overall, top three overall di hende muhe y hende homber den categoria individual di e Half Marathon y nan tin diferente premio di categoria di hende homber y hende muhe individual, di ekiponan corporativo nan lo tin hende homber di 4 pa categoria, top tres di hende homber, hende muhe y mix.

Di e parti di studiantenan e aña aki nan lo tin e premio pa ekipo di hende homber, hende muhe y mix.

Pa finalisa, e careda aki segun Erasmus a confirma den e conferencia di prensa mes, cuater atleta internacional lo participa e aña aki.