Tur dia mas ayudo ta yega St. Maarten. E isla si a scapa e horcan Jose diasabra. Sinembargo e parti Hulandes di St. Maarten awor ta conta 4 morto: a haya 2 curpa ta drif den lama. Identidad di nan no ta conoci.
Gobierno Hulandes a anuncia ayera cu lo manda mas militar. For di Corsou tin 48 militar na caminda. Awe en mañan lo yega mas di Hulanda tambe hunto cu un otro avion cu a sali ayera cu 40 ton di cuminda, awa y material medico. Asina lo bay tin alrededor di 550 militar riba St. Maarten.
For di Aruba tambe mas hende ta bay e isla afecta: ayera e di dos grupo cu boluntarionan di Cruz Cora a bay (riba potret). Tambe banco CMB ta informa cu 4 persona ta bay asisti gruponan specialisa na St. Maarten den e esfuerso pa pone e isla bek riba pia. “Un esfuerso solidario cu ta yuda fortalece lasonan di hermanidad y amistad den nos reino treciendo speransa bek pa St. Maarten. Ta desea e grupo balente aki tur clase di exito y perseverancia den e acto noble aki”, e banco ta laga sa.
Mientrastanto Rey Willem-Alexander tambe a yega Corsou pa asina tene su mes di cerca na haltura di e situacion. Tambe a cuminsa evacua turistanan Hulandes y personal di Hulanda staciona na e isla pa Hulanda. Ta trata di mas cu 500 turista cu lo ta riba lista pa evacuacion. E prome personanan cu a wordo evacua, manera conoci, ta hende cu mester ayudo medico. Aruba mes a ricibi un gran cantidad diabierna pasa.
Defensa Hulandes tambe ta bisa cu tin posibilidad awor cu barconan grandi por sali for di St. Maarten. E prome barco crucero a sali ayera.
E siguridad sinembargo ta keda un reto. Awe lo yega 100 militar hunto cu 20 marinier pa asina por asisti pa mantene ordo. Esunnan cu kier mas informacion of kier contacto cu hende na St. Maarten por yama +31 2020 51 351.
