E ultimo informacion ta cu horcan Irma a tuma bida di 5 persona na St. Maarten, 1 na e parti Hulandes y 4 na e parti Frances. Tambe tin mas cu 20 herida. Total awor Irma a causa 14 morto. Na Aruba ministerio di Enseñansa ta laga scolnan cera mas trempan, 11’or, pa motibo di e calor inmenso, como cu e horcannan den region ta bay cu tur biento.
Mayoria parti di e isla St. Maarten ta destrui. Militarnan di Defensa Hulandes y tambe miembronan di Arumil di Aruba ta purba di yuda y mantene ordo. E ultimo ta necesario como cu tin hopi plundermento. Habitantenan ta bisa cu tin basta hende cu arma riba caya y tin cu ta bisa cu ta atracando hende den cas. Diferente tienda a habri nan porta pa laga hende bay cu alimentacion por nada. For di Hulanda (Eindhoven) dos avion cu mas cu 100 miltar y material a sali rumbo St. Maarten (potret). E meta di defensa Hulandes ta pa hiba awa y cuminda pa ta suficiente pa sostene 40.000 persona pa 5 dia. Ayera atardi un otro barco Zr. Ms.Pelikaan a yega St. Maarten pero awor a sali bek pa Corsou.
Preocupacion grandi di dos horcan
E gobierno local tin hopi dificultad pa restaura ordo. No tin liñanan di comunicacion y casnan di polis ta destrui. E preocupacion mas grandi ta e di dos horcan Jose cu ta spera diasabra caba. Awor e ta un categoria 2 (Irma tabata un categoria 5, awor el a baha na 4). Como cu awor poco ta prepara y ta spera hopi awa atrobe cu por causa hopi mud slides.
Aeropuerto na parti Hulandes ta habri pero solamente pa avionnan militar. Autoridadnan Frances ta bisa cu nan aeropuerto no tin asina hopi dano cu esaki di St. Maarten parti Hulandes. Tin pashentnan cu malesanan cronico, entre otro cu ta depende di dialyse, cu no ta haya nan tratamento medico. Manera menciona e waf a sufri hopi daño tambe. E partinan mas afecta na St. Maarten parti Hulandes ta: Cay Hill, St.Peters, Cole bay, Simpson bay, Point Blance na e parti Hulandes.
