universidad (2).jpg

Universidad di Aruba ta brinda un caluroso bonbini na 68 cursista pa su programa mas nobo, esta Academic Foundation Year.

 

Glenn Thodé, rector di Universidad di Aruba durante di e ceremonia di apertura di e programa a splica cu e meta principal ta pa yuda hobennan cu a gradua for di un scol secundario prepara, orienta nan mes miho y haci nan mes mas fuerte y independiente pa cuminsa un educacion superior cu un bon fundeshi.

 

Universidad di Aruba a prepara en realidad pa ricibi 40 studiante pa e programa di un aña, pero e registracionnan a surpasa tur expectativa. Thodé ta splica cu e programa ta resultado di e observacion cu hobennan cu ta haciendo e transicion for di un scol secundario pa un scol superior, manera Universidad di Aruba y otro institucionnan den exterior, ta haya nan mes cu dificultadnan pa logra un transicion cu exito.

 

Analisando e situacion a dicidi pa haci algo pa yuda e studiantenan aki cu ta wordo prepara den e parti cognitivo, pero hopi biaha ta falta competencianan fundamental cu ta un rekisito di e mundo academico.

 

Bira mas pro activo

Thodé ta bisa cu ta mira den e parti di “actitud” cu e hobennan ta custumbra cu un forma mas pasivo di traha y ta necesario pa yuda nan pa medio di training pa bira mas pro activo. El a agrega cu tin tambe e factor “skills set”, unda cu e studiante mester custumbra cu por ehempel haci mas investigacion, y e mester presente y elabora riba ideanan, tanto skirbi, como verbalmente. A nota cu e studiantenan ta carece tambe di e habilidad y training pa comunica den e sentido aki.

 

Un otro elemento cu e programa ta enfoca riba dje ta miho orientacion riba diferente tipo di estudio. Segun Thodé ta splica, Universidad lo provee “sample” di diferente estudio pa asisti e studiantenan den descubri un estudio cu nan por identifica nan mes cun’e, cu nan ta sinti un pasion pa sigui cun’e te na nan graduacion. Identificacion pa medio di experiencia ta un proceso pa yuda e studiante scoge loke e lo kier haci den su bida como trabao y profesion, loke nan tin e “drive” pa persisti riba dje.

 

E rector  ta conclui bisando cu e programa ta basicamente reenforsa disciplina y e actitud pa studia den un instituto academico, e ta reenforsa e “skills set” y ta reenforsa e conocemento y experiencia di e studiante encuanto kico ta motiv’e, su pasion y e carera cu e ta sinti un anhelo pa forma su mes excelentemente den dje.

 

Studiantenan

Annemarie Carillo ta un di e studiantenan aki. Como un graduado di HAVO, el a scoge pa e programa aki, cu ta dun’e e oportunidad pa sigui cursonan den maneho, arte, ciencia, ley y orienta su mes riba e estilo di bida universitario.

 

E ta bisa cu e curso ta brinda un base amplio y ta haci e studiante mas fuerte. Asina ta yuda hobennan cu a slaag, pero no ta cla pa sigui un estudio superior, of no sa ainda kico nan kier studia pa nan preveni di bay y resulta probablemente den un of mas cambio di estudio.

 

Juan Kelly tambe ta un graduado di Colegio Arubano kende ta atendiendo e programa nobo. El a bisa cu e oportunidad pa bira mas independiente den studiamento ta loke a atrae pa registra pa e programa.

Hopi studiante no tin e disciplina y no ta suficiente independiente, no tin e habilidad nan pa ta riba nan mes pa studia, y biba, den un pais cu nan no conoce ainda. E programa di Universidad di Aruba ta yuda den e proceso aki.

 

Kelly a agrega cu e mes no ta sinti cu e ta suficiente independiente den su forma di studia y p’esey a scoge pa e programa pa yud’e yega unda cu e ta desea di ta.