AHATA a reacciona tocante reunion publico riba ley di impuesto: “Gobierno no ta compronde con economia ta funciona”

Aruba Hotel & Tourism Association (AHATA) a reacciona riba e reunion publico di ayera na Parlamento di Aruba tocante ley di impuesto. Den un comunicado di prensa di ayera cu e titulo “Ultimo momento gobierno a agrega un medida sorprendente cu consecuencia grave,” nan a trece dilanti cu “nos gobierno a hinca un medida grave nobo den e ley di impuesto, mientras cu Parlamento ta cuminsa trata e ley awe mes.”

“E medida nobo ta cu TUR compania local cu ta usa un servicio of ricibi producto di otro pais, por ehempel un licencia di software, mercadeo, consulta di expertonan, of cualkier producto ta responsabel pa paga BBO riba e servicio of producto na Aruba. Esaki ta un gasto grandi nobo pa e compania local,” segun AHATA.

“Den un sistema indirecto manera BTW, un regla asina ta posibel, pasobra e sistema ta duna compania oportunidad pa trek af loke a paga for di loke e debe. Pero den sistema di BBO esey kiermen cu ta djis agrega mas gasto enorme.  Cu mas gasto grandi asina un compania tin dos opcion: 1. E compania mester sigui hisa prijs pa comunidad, 2. E compania ta keda cu menos entrada.  Cierto compania no por hisa prijs pasobra e mercado no ta tolera un prijs mas halto, y e ora tin menos entrada pa inverti den economia of pa emplea hende”, AHATA ta indica.

Ta continua bisando cu “e medida aki tin consecuencia grave, y ta parce cu nos gobierno no ta compronde con e economia ta funciona y no tin comprension pa con caro Aruba lo ta pa tur hende. Ademas ta keda kibra e clima di inversion”.

“Pa hinca e clausula nobo aki na ultimo momento den e ley di impuesto, gobierno no ta duna Parlamento oportunidad pa papia cu representantenan den comunidad y compronde e consecuencia di e texto di ley. Esey kiermen cu gobierno kier djis pusha e medida dañino prome cu hende realisa. Cu medida asina extremo, por conclui cu nos gobierno no tin bienestar di nos comunidad na pecho y no tin conocemento di nos economia”, nan ta sigura.

Igualmente a bisa cu nan por nota si cu den e mesun Nota van Wijziging a coregi otro texto cu tambe lo tabatin consecuencia negativo pa nos economia, despues cu AHATA a manda carta y a sinta dialoga. Pero a agrega texto nobo cu tambe tin consecuencia grave. “ainda nos representantenan den Parlamento por demostra cu nan ta tuma nan tarea na serio, y no ta “stempelparlement”. Parlamento por evita di aproba e clausula sorprendente y dañino pa nos economia”, e texto a finalisa.