Den varios columna den pasado nos a stress e importancia di baha prijs di coriente na Aruba, debi cu esaki lo tin su efectonan positivo directo, tambe cu su spill-overs masivo pa nos economia y nos cuenta coriente como pais. Prome cu nos cuminsa cu e tema di e columna aki, mi persona kier a nota lo siguiente.

Prijs di petroleo crude oil a baha cu mas cu 30% den e aña cu a pasa, na e momento aki e prijs pa un bari di crudo ta menos cu $60,- US. Awo cerca mi persona ta surgi e pregunta: Con por ta cu prijs di coriente (y awa), no a baha ni 1 cen en/of ni un anuncio a wordo publica pa discuti esaki? E factor mas grandi den produccion di coriente na Aruba ta e prijs di crudo. Como cu prijs di crudo ta informacion publico nos por nota cu esaki a baha enormemente. Pa mi e lo ta mas cu logico pa cuminsa un discusion pa baha e prijsnan sofocante di coriente aki na pais Aruba.

Aruba como pais chikito ta importa casi tur cos incluso panelnan solar. Si nos wak e prijs di panel solar riba mercado cu pa compra bulk di “full black” solar panel ta costa solamente 0.145 Euro cen pa Watt. Dus un panel di 500 Watt ta mas o menos 150 florin so esaki lo costa si no tabatin e factor di transporte den e calculacion.

Un di e tecnologianan di panel solar mas visionario ta di e categoria “Perovskite”, debi na varios factor di natuurkunde e celnan solar aki tin un eficiencia hopi mas halto cu esunnan basa riba Silicon. Na mesun momento pa produci panelnan solar di Perovskite ta mas barata compara cu Silicon. En berdad e ta parce cu Perovskite lo por hunga un parti hopi grandi di futuro energetico di mundo henter. Esaki ta e inspiracion pa un team internacional di ingeniero basa na Suisa su universidad tecnico di mas renombra, esta Polytechnique Fédérale de Lausanne (EPFL).

Den nan paper “Design and Cost Analysis of 100 MW Perovskite Solar Panel Manufacturing Process in Different Locations” publica den 2022 den ACS Energy Letters, e grupo aki a calcula cu den regionnan cu hopi solo, manera Egipto, cu e prijs di coriente di e panelnan solar basa riba Perovskite, por ta solamente 8 cen florin pa kWh, compara cu e tarifa awo di 34 cen per kWh, un reduccion di mas cu 75%.

Loke ta haci esaki mas atractivo ainda, ta e hecho cu e ingenieronan Suisa a traha un diseño completamente “open-source” di un fabrica di panel solar Perovskite. E concepto no ta tuma hopi oppervlakte, dus e concepto aki lo ta perfecto pa por ehempel San Nicolas su area di ex-Refineria. Ademas, e costo mas grandi di e fabrica ta coriente, debi cu e fabrica por produci zonnecellen na un prijs super barata e ingenieronan a conclui cu den regionnan cu hopi solo, manera Aruba cu e fabrica lo por paga su mes back den menos cu 1 aña!

E concepto publico aki, basa riba investigacion di e caliber mas halto, ta merece su atencion den mi opinion humilde, debi cu por produci coriente na prijsnan casi inimaginabel pa nos awo, lo no tin gastonan di transporte internacional di panelnan solar manera awo, tambe cu un inversion cu lo paga su mes back den menos cu 1 aña, y como delaster punto e fabrica no ta rekeri hopi tera. Tur esaki hunto lo haci un concepto manera esaki toch wel notabel pa nos pais.