CEDE ARUBA ta informa henter comunidad cu e di seis edicion di BAN CAYA na Santa Cruz lo cambia di fecha cu originalmente tabata programa pa dia 3 di mei, pa tuma luga den luna di september. E cambio aki ta debi na diferente actividadnan cu ta den nan fasenan final di competencia cu ta tumando lugar den e dianan venidero.
BAN CAYA ta un proyecto cu ta forma parti di e programa BARiO UNiCO di CEDE ARUBA. Durante e ultimo dos añanan, BAN CAYA a resulta di ta un evento exitoso pa Aruba su comunidad. E ta un movemento positivo cu ta trece e comunidad hunto, unda cu ta cera conoci cu e Centro di Bario y tambe cu hopi otro organisacion di e bario cu tin programa y actividad pa un y tur. Durante BAN CAYA, un cantidad grandi di hende ta bin hunto pa diberti, ricibi informacion social, cultural of deportivo, haci movecion riba un atardi, mientras por admira artistanan local riba escenario.
En general, CEDE ARUBA ta contento di mira cu den e ultimo 2 añanan comunidad ta haci mas uso di e Centronan di Bario y ta mira cu tin mas actividad den e barionan, sea ta deporte, movecion, musica, arte, baile of seccionnan educativo. Pa medio di e programa BARiO UNiCO a logra mobilisa hopi organisacion, crea conexion nobo y tambe atrae fondonan adicional. Organisacionnan cu tin proyecto pa desaroyo pa e bario y participacion di gruponan specifico por tuma contacto cu CEDE ARUBA pa evalua posibel sosten.
CEDE ARUBA, tambe ta conoci como Centro Pa Desaroyo di Aruba, ta un organisacion di desaroyo cu tin como meta pa promove desaroyo sostenibel uniendo hende y recursonan. E organisacion ta comprometi pa trata problema socioeconomico y social na Aruba facilitando conexion entre e grupo di enfoke y promoviendo oportunidadnan pa desaroyo social y educativo. Nan meta final tapa crea un comunidad unda individuonan di tur edad y background tin e oportunidad pa desaroya nan mes.
Pa mas informacion: www.cedearuba.org
