Weekend ultimo, abogado di parlamentario Mike de Meza, a confirma pa un noticiero local cu De Meza a entama un caso contra Departamento di Impuesto. Parlamentario De Meza ta un candidato pa minister pa partido AVP den coalicion.
E caso ta relaciona cu e proceso di screening, cu te awor ta preveni De Meza di asumi e funcion como minister cu su partido a nomin’e p’e. E abogado a splica portal online NoticiaCla cu no ta contento con e proceso a bay cu DIMP y cu mester di mas claridad, den forma di un carta, splicando e comportamento fiscal di De Meza. Sinembargo, ta indica cu no a ricibi e claridad desea, y a opta pa bay corte.
NoticiaCla a reporta cu anteriormente, e abogado a duna DIMP un deadline di dia 17 di april ultimo, unda DIMP a cumpli y a duna un contesta na De Meza. Sinembargo, e contesta tabata negativo, segun NoticiaCla.
Maske a duna informacion, abogado di De Meza ta bisa e tempo ey cu e informacion no ta klop.
“E no ta klop”, e abogado a bisa NoticiaCla e tempo ey. E abogado a pidi mas clarificacion, pero e contesta di DIMP ta keda negativo, y alabes no ta satisfactorio pa De Meza.
E desaroyo aki ta bira interesante, pa motibo cu si hues interveni den e proceso di screening, e ora e lo habri caminda pa intervencionnan similar den otro casonan di screening, cu por perhudica cierto persona. Un precedente legal asina por trece diferente consecuencia, pues mester keda pendiente na e decision di hues den e caso aki.
Screening
Durante proceso di formacion, formadornan Mike Eman (AVP) y Gerlien Croes (Futuro) a dirigi e proceso di screening di tur candidato. Manera a reporta e tempo aya, e proceso ta largo y hopi profundo, y ta tuma su tempo. Entre tanto, tur candidato pa minister di ambos partido a pasa e screening y a asumi nan posicion como minister – cu excepcion di Mike de Meza.
De Meza mes a confirma anteriormente cu e problema pakico e no a pasa e screening ta sinta na Departamento di Impuesto.
Fin di april, prome minister Mike Eman a splica despues di un reunion cu Gobernador di Aruba, cu el a bolbe entrega documentonan adicional cu e fiscalistanan di parlamentario De Meza a entrega na su persona, unda tin splicacion detaya cu ta indica cu Sr. De Meza ya a paga tur locual ta su obligacionnan di belasting durante añanan anterior, y ademas ta duna un relato amplio tocante e cumplimento di parlamentario De Meza pa loke ta trata belasting.
Prome minister Eman a remarca cu De Meza y su fiscalistanan a produci hopi documento pa mustra cu en realidad locual tabata e inkietud pa su posicion, den e forma con nan ta articul’e, nan ta mira cu e no ta algo cu mester impedi De Meza pa bira minister.
Miembro di prensa a puntra prome minister kico ta e situacion e ora cu DIMP, ya cu na final e departamento ey tin cu duna luz berde pa parlamentario De Meza por bira minister. E mandatario a splica cu esey ta corecto y esey ta e disputa cu tin na e momentonan aki cu e fiscalistanan di impuesto cu ta basa nan documentonan riba cierto puntonan y di parti di e fiscalistanan di Sr. De Meza ta opone e partinan aki.
El a agrega cu di locual el a compronde ta cu e caso aki lo por termina den corte. “Mi tin indicacion cu si no bin un apertura cu e caso aki por termina den corte, caminda e fiscalistanan di Sr. De Meza lo bisa esaki ta e cosnan cu ta ser bisa y segun nos fiscalistanan nos tin un otro opinion riba esey. Esey sigur lo por trece un claridad tambe pasobra ora papia di temanan fiscal e ta bira un poco complica pa otronan husga y bo mester expertonan pa husga,” el a señala. Awo esaki a bira un realidad.
Contestando pregunta tocante e periodo anterior cu Sr. De Meza tabata minister caba y con e lo a pasa e prome screening, teniendo na cuenta e periodo cu DIMP ta bayendo back na dje pa loke ta su cumplimento, e mandatario a indica cu esey ta algo cu e no por drenta den e detaye pasobra na final di dia ta papiando di cosnan priva.
Na mesun momento el a indica si cu e ley tabata diferente e tempo ey. E tempo practicamente si un hende ta bay bira minister y ainda tin algo pendiente, ora e pag’e of yega na un areglo, esey tabata practicamente loke tabata ser midi. Pero aworaki, el a splica, e ta ser corta den dos fase. Uno ta e “fiscal gedrag”, cu ta tocante e cumplimento y despues ta bin e parti di pago.
El a agrega cu eynan ta unda cu si e persona cumpli mes despues cu tur su pagonan, toch ta keda mira cu e periodo di cumplimento. Y esey ta e discusion cu tin cu e fiscalistanan di DIMP cu ta bisa un cos y e fiscalistanan di Sr. De Meza ta bisa otro.
Prome minister Eman a subraya cu si nan no por sali afo di e situacion aki, e ora probablemente e caso lo bay corte pa corte por dicidi si berdaderamente esaki ta un bon analisis. Y awo abogado di De Meza ta confirma cu nan ta bay corte.
“Finalmente mi ta kere un decision di corte lo por trece hopi claridad den esey y kita e aspecto politico tambe, y dicidi den un forma profesional con ta cana. Na mi parecer Sr. De Meza pa su carera, pa su dedicacion pa nos pais, merece di haya tempo y merece di haya un trato husto pa por cana e caminda ki te unda cu e recursonan duna,” Eman a remarca.
Pa loke ta e funcionamento di Gabinete AVP-FUTURO cu seis minister solamente, el a splica cu e situacion ta pone un peso grandi riba minister Dowers den e caso aki cu ta cargando e cartera di e di siete minister, ken lo mester tabata De Meza.
El a indica cu den e dianan aki probablemente minister Dowers lo ta mirando tambe riba algun consehero cu e lo por pone banda di dje cu tin conocemento specifico riba e temanan cu e minister De Meza lo a atende cune. E ora ey ta bay haya un refuerso di parti di conseheronan cu por yuda pa e cartera di e candidato minister De Meza por sigui cana mientras cu ta wardando e proceso aki.
