(Infobae) – Fiscal General di Bolivia, Roger Mariaca, a bisa ayera dialuna cu e orden di captura contra ex-presidente Evo Morales ta keda na vigor, pa un caso di trata grave di persona, despues di e resolucion di un hues di La Paz cu a suspende otro fayo hudicial cu tabata beneficia e ex-presidente.
E fiscal general a señala cu “ehecuta” e orden di captura “ya ta un trabao di polis.”
Siman pasa, defensa di Morales (2006-2019) a duna di conoce e auto constitucional emiti pa e hues di region oriental di Santa Cruz, Lilian Moreno, y cu a anula e orden di captura cu tabata existi contra e ex-mandatario, ademas di e traslado di e proceso na e region di Tropico de Cochabamba, su bastion politico y sindical principal.
E fayo di Moreno a keda cuestiona pa presidente di Tribunal Supremo di Husticia, Romer Saucedo, mientras cu e Conseho di Magistratura a anuncia inicio di un investigacion.
Diabierna a emiti un fayo hudicial nobo, e biaha aki firma pa hues Franz Zabaleta, di La Paz, kende a dispone pa mantene activo e orden di detencion contra Morales.
E fayo di Zabaleta a señala cu “como medida cautelar ta duna orden pa sospende temporalmente e ehecucion di tur determinacion adopta” den e caso, maske e medida a keda desconoci pa abogadonan di Morales.
E resolucion firma pa hues Moreno cu tabata beneficia Morales a keda denuncia weekend ultimo pa Ministerio di husticia, segun Mariaca a informa, y e demanda a keda acepta pa Fiscalia Departamental di La Paz. Pa e motibo aki, hues Moreno a keda deteni ayera na ciudad di Santa Cruz, y oranan despues, a traslad’e na La Paz pa declaracion y pa somete na un audiencia di medida cautelar. Mariaca a splica cu ta procesa Moreno pa delito di “desobediencia na resolucionnan den accion di defensa y di inconstitucionalidad.”
Na october 2024, fiscal departamental di Tajira a dicta un orden di captura, cu no a ser ehecuta, contra e ex-mandatario pa supuestamente haya un yiu cu un menor di edad, tempo cu e tabata presidente di Bolivia.
