Atrobe sin cambio…Den practica politico…?

Ora un gobierno nobo tuma rienda di e pais, ta normal pa publica en linea general kico ta e plannan. Como medio, nos a asumi e tarea di publica ampliamente e plannan riba diferente tereno di gobernacion pa e periodo nobo aki. Awor ta na nan pa implementa, pa nos por comproba si tin cambo real of no, den contenido y manera di implementa.

Na inicio di e periodo di gobierno aki nos por a ripara caba cu cierto custumber bieu no a keda pa pasado, sino cu nan a biaha pa e periodo aki tambe. Por ehemplo e caso di nombramento di miembronan di directiva y di hunta di comisario pa diferente entidad (semi)estatal unda gobierno tin derecho di nombramento. Naturalmente gobierno por semper argumenta cu nan no ta haciendo nada mas cu ehecuta e derecho ey. Esey ta berdad pero e asunto tamustra semehanza atrobe cu un asalto hudicial, den sentido di “shoot first, ask questions later” ora nan drenta. E punto ta cu nan preocupacion y hasta obligacion di ta involucra den maneho di e entidadnan aki, no ta cuminza ni termina cu nombramento di directiva nobo, obviamente di nan ‘personanan di confianza’ manera nos ta formula esaki semper. Nan preocupacion cu e cantidad considerable di entidad menciona ta primordialmente e ‘buena marcha’ interno y e desaroyo solido y bon administra di cada un di nan. E obhetivonan ey bo no por logra nunca cu e solo cambio di directiva, sin cu como gobierno bo por clarifica, no solamente internamente sino pa publico en general, kico ta bo maneho cu bo ta desea di implementa y pakico. Y aki ta unda nos, te awor en todo caso, no ta mira mucho cambio, mientras e promer casonan di retiro ‘en bloc’ ta tumando lugar caba, manera na e empresa cu ta maneha nos aeropuerto, AAA NV. Loke te awor a aparece den prensa ta mustra cu cos ta bayendo segun e custumber di semper, di promer cu tur cos sigura e ‘takeover’ politico y despues…? Normalmente despues nos no ta ni haya di tende mes kico ta e cambionan den maneho di e entidad y mucho menos pakico nan lo ta beneficioso pa e empresa mes, pa aviacion, pa cliente y pa comunidad en general. Pa tur claridad, e practica aki cu ta aparece aki atrobe, no ta patrimonio exclusivo di e gobierno nobo, pasobra tanto nan mes, por lo menos e partido grandi den e coalicion, como nan contrincante rival cu a caba di sali di gobernacion, a laga atras un bon cantidad di ehemplo con tradicionalmente ta efectua e cambionan di gobierno aki. Di loke nos por a mira den prensa local, e forma di retiro ta duna e impresion cu a studia e minimo di formalidad cu ley ta exigi, pero no mas cu esey tampoco, cu e observacion acerca cu nos no por a averigua pa nos mes si en berdad a cumpli cu e minimo cu ley ta prescribi, pesey anto di nos banda no mas cu ‘beneficio di duda’ te cu tin mas clarificacion.

No tur caso ta di mesun indole; nos por a ripara cu den e caso di analisis y investigacion di varios entidad cu ta ricibi subsidio gubernamental relaciona cu deporte, a inicia cu e actividadnan di auditoria, tambe pasobra den e casonan aki ta trata di entidad unda gobierno no tin poder di nombramento, en todo caso no completo, di directiva o hunta supervisor. Asina mes nos ta haya falta di e cuadro general di e maneho nobo cu e ministro recien nombra ta propone. Naturalmente ta bon pa comproba cu placa di subsidio den pasado a ser usa di forma corecto, pero bo tarea no a termina ey. Kico ta e proposito di e maneho nobo? Mester bin un reorientacion di e fluho di subsidio? Mas pa kico y menos pa otro? Si no ta duna claridad di esey, y claro nos por comprende cu no por splica tur cos den e promer simannan, nos ta keda pega como comunidad den e incertidumbre y pleito politico, unda simpatizante ta defende un maneho no conoci den detaye, mientras contrincante ta exigi un transparencia cu nan tampoco nunca a practica.

Esaki no ta beneficia nos como pueblo en general y tampoco ta yuda na yega na mihor gobernacion, pasobra ta hustamente e practicanan aki, di plama propaganda pero despues no informa publico mas, ta loke nos tin nos unda nos ta awor. Sin duda algun, aki ta unda den practica lo mester bin cambio grandi y esey en berdad tin tur cos di haci cu ‘transparencia’. Lamentablemente esaki ta un di e lemanan mas usa y abusa den ultimo decadanan, sin cu realmente nos por mira un avance. Nos ta bolbe na e caso di aeropuerto. Nos tin informacion general di aeropuerto, libremente accesible como ciudadano, pa nos por tin un idea mas detaya di con ta maneha e entidad sumamente importante aki pa nos economia? Asina leu cu nos sa, nos no tin acceso na e cuentanan anual di e compania, mescos cu gran mayoria di entidad o empresa estatal cu ta briya pa ausencia di nan que hacer financiero. Con anto, como ciudadano o medio di prensa, por haci pregunta mas detaya, na e compania o na e ministro encarga, kico ta e asuntonan cu nan kier cambia cu merece mehoracion? Nos no tin un idea y ta parce cu no lo bin un fin tampoco na e practica aki, cu no ta cuadra cu e concepto di transparencia den un estado moderno di e siglo aki.