Diasabra prome minister Hulandes, Dick Schoof a yega Aruba pa su prome bishita oficial di trabou. El a ser ricibi pa prome minister Mike Eman na Aeorpuerto Reina Beatrix y despues di un encuentro na Cocolishi y Bestuurskantoor e mandatarionan di Hulanda y Aruba a duna declaracion oficial na prensa na Fort Zoutman.

Primeramente prome minister Eman a hiba palabra enfatisando e importancia di e bishita di prome minister Schoof na Aruba.

“Esaki ta un dia special pa Aruba y tambe den un monumento special di Aruba tambe ta unda e lasonan entre Aruba y Hulanda a cuminsa y nan ta bay hopi leu back den historia di Aruba y manera por mira den un Fort asina, nan tambe ta hopi duradero y tambe a sobrevivi e prueba di tempo y awe mi mester bisa cu nos tin masha hopi alegria di por a ricibi Sr. Dick Schoof como e prome premier den su funcion aki na Aruba,” el a remarca.

El a splica cu e nan a hiba discusionnan cu ta hopi importante pa Aruba pero tambe pa Hulanda.

El a indica cu nan a enfoca riba unda e oportunidadnan di “win-win” ta sinta pa e relacion entre Aruba y Hulanda unda nan por inverti hunto cu un vision, un perspectiva pa futuro.

“Den e oportunidadnan aki nos ta mira cu e posicion strategico di Aruba dentro di e region un biaha mas por importante pa Hulanda y nos a discuti esaki tambe cu prome minister. Nos tin tambe a sintimento di compromiso, a sinti un interes pa cual nos ta agradecido prome minister Schoof,” el a subraya.

Prome minister Eman a remarca cu e poblacion tambe ta mirando e encuentro cu e prome minister Hulandes cu hopi interes pasobra e relacion entre Aruba y Hulanda no ta djis un herencia.

El a indica cu Aruba a haya na varios momento e oportunidad pa scoge pa bandona Reino, pero cu conscientemente Aruba a scoge cada bes pa keda dentro di Reino. “Nos ta parti di Reino pa escogencia, no solamente for di e herencia di historia colonial, pero nos a scoge di berdad pasobra nos ta mira e balor agrega di e relacion,” el a enfatisa.

Durante e encuentro na Fort Zoutman, prome minister Eman y prome minister Schoof a planta hunto un mata Wayaka como acto simbolico di cooperacion y traha hunto riba algo cu lo florece y cu lo dura pa su resiliencia den temponan dificil.

“E palo di Wayaca tambe ta conoci pa su resiliencia den sobrevivi tempo dificil, pero tambe ta conoci como un palo cu ta revela su mes pa e goso di bida y speransa den bida y e relacion entre Aruba y Hulanda ta duna speransa,” el a agrega.

Di su banda prome minister Schoof a expresa su alegria pa por bishita Aruba y pa e palabranan di bon bini caluroso. “Si ta trata di core hunto, of si ta trata di laga paisnan compronde otro miho pa por traha miho hunto, tur esaki tin gran balor. Tambe e accion special di planta e palo di Wayaca hunto… Esaki tabata un momento berdaderamente special cu nos a por a haci hunto,” el a expresa.

Prome minister Schoof a remarca cu e ta contento cu nan por a hiba un combersacion largo cu prome minister Eman y su coleganan minister. “Ora cu e gabinete nobo AVP-FUTURO a huramenta dia 28 di maart ultimo, nos ta mirando dilanti pa un colaboracion bon y constructivo,” el a agrega.

E mandatario a enfatisa cu igual na loke prome minister Eman a bisa tocante enfoca riba unda e oportunidadnan di “win-win” ta sinta pa e relacion entre Aruba y Hulanda, unda nan por inverti hunto cu un vision, un perspectiva pa futuro, e tambe ta mira riba e cooperacion pa sigui traha hunto riba esey, den un forma cu ta basa riba igualdad y respet mutuo, pasobra Aruba ta un pais valioso den Reino.

Prome minister Schoof a splica cu e gobernacion nobo, nan kier sigui e bon colaboracion, manera den e marco di finanzas publico solido y autonomia economico. El a subraya cu den e temponan aki cu tin hopi tormenta geopolitico, ta importante pa e colaboracion den Reino continua.

El a menciona tambe e anuncio reciente di presidente Trump tocante e tarifa halto di importacion pa Merca, cual por tin un impacto grandi riba compania y consumidornan, no solamente na Hulanda, pero probablemente mas ainda na e parti Caribense di Reino. “Mi ta kere cu ta importante pa nos keda na alerta riba esey y pa traha mas cerca hunto,” el a remarca.

Prome minister Schoof a trece dilanti tambe cu via e Landspakket Aruba ta trahando intensamente riba un set di reformanan cu mester fortalece e resilencia sosio-economico y seguridad financiero. “Mi ta satisfecho pa mira cu Aruba a tuma paso grandi na esey mehorando e maneho financiero y e clima di inversion. Tambe, den e organisacion gubernamental di Aruba tin un mehoracion na nivel di hende y medio. Un autoridad pa competencia a ser crea – tur cos importante,” el a agrega.

Por ultimo e mandatario Hulandes a indica cu su bishita na Aruba no ta solamente pa papia cu su coleganan minister, pero e tin un bishita varia. El a indica cu durante su bishita na Aruba tabata riba agenda pa explora e zona turistico importante na Palm Beach, un bishita na e Altovista Winery, un criadero di galiña, Dr. Horacio Oduber Hospital y tambe e instituto coreccional KIA.