“Mi a ripara cu ta na Aruba ta enfoca hopi riba ‘win win,’” tabata e reaccion di Prome Minister di Hulanda, Dick Schoof kende tabata na Aruba den fin di siman como parti di su bishita di introduccion na e parti Caribense di Reino. E remarke aki a bin durante un encuentro cortico cu prensa despues di un recorido na Dr. Horacio Oduber Hospital y facilidadnan di e Crisis Management Office.
“Aunke hopi di e discusionnan riba cooperacion y sosten ta regarda responsabilidad di e Secretario di Estado encarga, mi ta haya importante pa tene e comunicacion directo cu Minister Presidente di Aruba y otro organonan. Mi ta traduci e dicho ‘win win’ na e forma con Hulanda y Aruba, a base di igualdad ta y por coopera cu otro. Esey ta e esencia.”
Schoof, despues di a inicia su dia cu coremento, su practica regular a bishita Alto Vista Winery y Pok Pok Chickenfarm pa haya un bista di e actividad y productividad economico cu por contribui na siguridad di cuminda na Aruba, un di e puntonan di e landspakket. “E ta un ehempel di empresaria creativo,” Dick Schoof a bisa. “Pa un pais cu tin cu importa hopi, e ta crucial cu por traha riba un actividad cu ta baha e presion aki.”
Pa Schoof, esaki ta esencial pasobra Aruba mester ta prepara pa para riba su mes. Como tal, e ta bisa cu Hulanda ta sostene e proceso pa yega na un colaboracion mas intenso entre Colombia y Aruba. Tambe Hulanda ta sostene e idea di un fondo di inversion pa asina Aruba inverti den proyectonan duradero, pero no a compromete na e contribucion Hulandes. Prome Minister Mike Eman a bisa Bon Dia Aruba cu ta discutiendo e tema aki cu Secretario di Estado Szabo, y Dick Schoof a mustra hopi cla cu ta Szabo ta responsabel pa yega na palabracionnan cu Aruba. “E idea di fondo di inversion ta hopi bon, pero ta e mester ta basa cu fondonan di Aruba mes. E prestamo cu Hulanda a duna sinembargo, ta placa cu mester paga bek na Hulanda, segun e palabracionnan haci y no cu ta pone e placa, cu no ta un regalo, den e fondo.” E Prome Minister Hulandes a enfatisa si cu e relacionnan cu Aruba ta bon, a pesar cu de bes en cuando por tin diferencia.
Crisis di refugiado
Pa loke ta e bishita na hospital, Schoof a bisa di ta impresiona pa e servicio cu ta brinda, for di servicio di emergencia te na cuido kirurgico, y a describi e institucion como uno moderno cu ta continuamente den proceso pa mehora servicio. Entre otro a duna Sr. Schoof un bista di cuido intensivo, y a pidi su cooperacion pa yuda pa Aruba participa den e red di compra di remedi, algo cu ta e caso na Boneiro.
Pero tambe a splica e Prome Minister Hulandes riba e reto di e cuentanan habri pa trata personanan indocumenta na Aruba, cu pa e aňa aki ya ta riba 300 mil (total tin un cuenta habri di riba 20 miyon). “Ya no tin e servicio di HIAS mas y formalmente nos ta manda e cobranza na prome instancia pa e cliente mes, pero si esaki no ta posibel, ta purba haya e pago for di Gobierno,” Jaco Vroegop a splica. Aruba a comprometi na Nacionnan Uni di lo cumpli cu tratadonan di refugiado cu ta implica e obligacion pa asumi responsabilidad pa salud di personanan refugia riba e isla. Pa algun tempo a ricibi sosten pa medio di HIAS cu tabata tuma encargo, pero desde e aňa aki, cu maneho di Presidente di Donald Trump, ya e organisacion internacional aki no ta ricibi e fondonan pa duna servicio na refugiadonan na Aruba. “Den principio ta un tarea di Aruba mes,” Dick Schoof a enfatisa durante e encuentro cu prensa ayera. “Hulanda tambe ta confrontando retonan cu personanan buscando asilo, pa asina trece control riba inmigracion. Aki ta unda por colabora pa mira con ta siňa di otro. “Si e necesidad ta bira hopi grandi, nos lo por traha cu otro.”
Prome Minister Mike Eman a bisa Bon Dia Aruba cu no ta e cuestion cu kier mendiga cerca Hulanda pa tur problema y cu e intencion ta pa formalisa e presencia di refugiadonan na Aruba pa asina un gran parti por drenta mercado laboral den forma legal y asina contribui na fondonan social tambe. E trabou ta den man di Minister di Husticia, cu segun nos leynan y tratado, ta e instituto responsabel pa refugiadonan. Segun mr. Eman, e proceso pa legalisa hopi refugiado a inicia caba.
Durante e recorido na facilidadnan di hospital, a haya presentacion tambe di e ekiponan di e Crisis Management Office bou encargo di Sr. Rino Hermans. Dick Schoof a bisa di ta contento pa mira con Aruba ta inverti den traha riba su resiliencia den caso di calamidad, sea ta natural, pa motibo di accident of pa motibo di crisis riba salud publico.
E bishita a conclui cu un bishita na e instituto coreccional, KIA. Segun Schoof, e ta contento di por mira atras na un bon encuentro na Aruba, unda e por a tene bon combersacionnan cu personanan dedica na e bienestar di e isla.
