Ayera mainta durante un conferencia di prensa na Club Kibrahacha 60+, IBISA y Club Kibrahacha a anuncia nan colaboracion pa expande e servicio di actividad fisico di movecion pa adultonan mayor.

Isnardo Faro, director di IBISA a expresa cu nan ta hopi contento di por anuncia e colaboracion aki despues di varios luna di combersacion pa e proyecto “Grandinan Activo”. El a splica cu e meta principal di e colaboracion aki ta pa brinda servicio extra y di calidad na adultonan mayor. “Un grupo cu merece hopi atencion. P’esey ta anuncia e proyecto aki cu lo cay bou di IBISA su proyecto “Nos Grandinan Activo” cu ta un proyecto cu ta andando caba pa varios aña,” el a indica.

Pa loke ta trata e proceso pa yega na palabracion final di e colaboracion, Faro a splica cu pa IBISA e proceso no a bay sin reto. El a indica cu IBISA su calendario ta yen di actividad di januari te cu december, pero asina mes a haci tur e intentonan pa por acopla Kibrahacha tambe pa realisa e proyecto aki.

Di parti di Club Kibrahacha, director Jeffrey Matos tambe a enfatisa e importancia di e colaboracion pa e proyecto aki. El a splica cu pa algun tempo nan tabata den combersacion cu IBISA pa logra e meta aki.

El a indica cu e aña aki Club Kibrahacha ta celebra 40 aña di existencia y parti di nan programa ta e parti di movecion pa adultonan mayor, cual ta un aspecto hopi importante den nan programa diario. Anteriormente nan tabata ofrece cinco dia di actividad di movecion, pero despues di Covid nan mester a reduci dos dia di movecion durante siman. Pero cu e colaboracion cu IBISA nan ta amplia nan programa di movecion di tres pa cinco biaha pa siman.

“Mi a haci e yamada seis luna pasa cerca IBISA nan a bisa di biaha si, pero mester a organis’e. Pero pa mi si ta si y awe nos ta caba di formalisa e si di seis luna pasa y esey mi ta aprecia hopi caminda nos por colabora hunto cu IBISA y su team,” Matos a indica.

El a splica cu e proyecto aki nan ta amplia nan programa di movecion ainda mas pa e adultonan mayor cu ta bishita Kibrahacha di dialuna pa diabierna. Ademas, el a agrega, e proyecto aki combina cu programa completo di Club Kibrahacha nan lo sigui amplia nan inclusion social cu nan ta enfoca riba dje como Club Kibrahacha pa e adultonan mayor na Aruba.

Will Erasmus Hefe di Departamento Sport y Movecion IBISA a splica cu e intencion di IBISA semper tabata pa yuda e grupo di adultonan mayor. Prome cu Covid nan a dicidi pa cuminsa cu algo pa adultonan mayor, nan a acerca diferente instancia, a cana e caminda cu nan pa wak kico nan mester, Kibrahacha tabata un di nan, pero despues Covid a yega y e proyectonan a para pa un tempo.

Despues cu tur cos a cuminsa normalisa y a cuminsa traha back a mira den e posibilidad pa por cuminsa cu e proyecto aki. E proyecto a cuminsa na diferente bario rond Aruba y aworaki a logra cera e colaboracion cu Club Kibrahacha pa inicia e proyecto eynan tambe.

El a remarca cu e no ta facil pa motibo di e falta di personal, como tambe e instructornan, pero asina mes a logra pa hiba e proyecto Club Kibrahacha. “Nos ta sumamente contento di ta akinan y spera nos por sigui crece den futuro. E meta di e proyecto ta pa hisa e calidad di bida di e adultonan mayor, laga nan ta mas activo, mas movecion,” el a remarca.

Sra. Lucia Hoek, Activiteitsbegeleidster na Club Kibrahacha a expresa su alegria cu por fin nan por cuminsa ofrece actividad di movecion fisico cinco biaha pa siman. El a indica cu hopi biaha e miembronan ta puntra pa mas movecion y aworaki, danki na e colaboracion cu IBISA, nan por haci esaki.

“Actividadnan di movecion ta hopi importante pa nos adultonan mayor, sigur mentalmente y fisicamente e ta hopi bon y ta yuda nan,” el a enfatisa.

Pa loke ta participacion den e proyecto aki, Hoek a splica cu pa por participa e adulto mayor mester ta of bira miembro di Club Kibrahacha y asina por bishita e Club y participa den e actividad di movecion, y tambe por participa den cualkier di e otro actividadnan cu Cluba Kibrahahca ta ofrece durante siman.

Por ultimo Rodymar Geerman Hefe di Departamento di Desaroyo di Deporte na IBISA a splica cu e parti di desaroyo di e adultonan mayor ta un aspecto cu IBISA ta trahando duro riba dje. El a remarca cu tin diferente actividad pa e adultonan mayor caba cu nan ta realisa, entre otro “Nos Grandinan Activo” cu ta ser realisa caba na Sport Centrum na San Nicolas cual ta e actividad di mas grandi cu tin na e momentonan aki.

El a sigui splica cu na Compleho Simeon Antonio nan ta duna les tambe pa adultonan mayor. Ademas nan ta brinda ayudo na un grupo grandi di adultonan na Centro di bario Dakota, y na Centro di Bario Noord tambe tin programa pa adultonan mayor.

El a indica cu e proyecto na Kibrahacha e adultonan mayor ta bay haya ayudo cu movecion, balans, y tambe cu nan parti cognitivo. Nan ta bay ofrece weganan recreacional unda cu nan ta usa nan mente pa nan por keda bij y contribui di e forma ey na e salud di adultonan mayor.