Despues cu mediante un carta, cu a circula riba rednan social y den medionan di comunicacion na Aruba, directiva di Arubaanse Voetbal Bond (AVB) a informa riba suspension di presidente di AVB, Sr. Randolf Lacle, weekend ultimo e Secretario General di e federacion a manda un carta nobo na tur miembro di e federacion anunciando e cancelacion di e suspension.
“Cu e e-mail aki, mi kier informa boso cu e presidente di AVB, Sr. Randolf Lacle, a keda reinstala den su posicion. E decision aki a keda comunica pa FIFA, manera confirma den e-mail manda na boso (…) pa Secretario General Achmed Nunes,” e carta nobo ta indica.
E carta ta continua bisando cu “pa clarifica, no tur miembro di e hunta ta di acuerdo riba e asunto aki. Sinembargo, mirando cu e hunta a ricibi e comunicacion oficial aki di FIFA, mi ta confirma cu presidente di AVB, Sr. Randall Lacle, a keda reinstala formalmente den su posicion riba dia 7 di mei 2025, y e ta bay presidi riba e congreso di awe, 8 di mei 2025, tocante e aprobacion di Statuutnan.”
E Secretario General ta conclui e carta gradiciendo e miembronan pa nan atencion y cooperacion.
