Recientemente CEO di Aruba Hotel and Tourism Association (AHATA), Tisa LaSorte a reuni cu prome minister di Aruba, Mike Eman pa toca diferente punto den comun relaciona cu sector turistico y pa delinea strategianan nobo pa controla e desaroyo di e sector aki den futuro.
Den su declaracion despues di e reunion cu e mandatario LaSorte a expresa cu e ta contento di por a reuni cu e mandatario, sperando cu esaki lo ta inicio di un serie di combersacion cu e prome minister.
“Mi ta aprecia cu como AHATA nos a haya oportunidad pa sinta cu prome minister y cuminsa nos combersacionnan, cu nos ta spera cu esaki lo bay ta un serie di combersacion cu nos ta bay sigui hiba durante gobernacion, unda nos porta ta habri cu otro, papia cu otro di kico nos ta mira como e prioridadnan pa economia, pa industria di turismo, kico ta bay ta strategianan nobo, kico ta e cambionan necesario cu ta mira cu ta necesario pa Aruba tambe pa e industria,” el a indica.
LaSorte a splica cu durante e reunion cu prome minister Eman nan a papia un tiki di con e sector hotelero ta sinta, con e structura di sector hotelero ta, kico ta e diferente impuesto cu ta ser paga y no paga. El a remarca cu tin cierto sector, manera por ehemplo vacation rentals, cu ta un parti grandi cu no tin cumplimento di impuesto.
El a indica cu nan a papia di diferente topico incluyendo gobierno su speransa pa e sector turistico, gobierno su speransa pa e dunador di trabao, y nan a combersa tocante unda ambos parti tin vision conhunto y unda tin vision cu ainda mester di mas combersacion pa yega na otro.
“E tabata un combersacion hopi positivo, productivo y habri. Mi ta kere esey ta algo hopi necesario, pa nos ta honesto cu otro pa asina nos por sigui cu un combersacion honesto y wak na kico nos por yega hunto pa yega na mas solucionnan pa Aruba su comunidad y Aruba su economia,” el a enfatisa.
La Sorte a menciona cu nan tin hopi punto cu nan ta mira cu nan mesun meta. Un di nan ta cu nan a ripara cu na Aruba mester tin un direccion pa turismo cu e comunidad tambe por ta contento cune, y cu ta haci cu tin un comunidad y un grupo di empleado cu ta sinti nan mes cu nan ta participante y cu nan ta beneficia tambe di e industria.
“Nos tur ta riba e mesun liña den e sentido ey cu nos tur ta beneficia. Si bo tin un industria positivo, bo tin un comunidad positivo cu ta sintie contento cu con cos ta bayendo na nos pais,” el a subraya.
Tocante e desaroyo di e sector y e efectonan cu esaki tin no solamente pa comunidad, pero pa naturalesa La Sorte a indica cu hopi hende ta sinti cu mucho hopi ta ser sacrifica di e naturalesa cu e desaroyo cu tabatin den ultimo añanan. El a remarca cu hopi hende a lubida cu a cuminsa cu e industria di turismo ora cu hopi hende tabata perde nan trabao na refineria.
El a splica cu na e momento ey a pidi inversionistanan hotelero pa bin Aruba pa inverti den un industria nobo, turismo, pa crea trabao y crea actividad economico.
El a sigui splica cu ora cu e refineria a cera a bolbe pidi inversionista pa traha mas hotel pa por crea un economia activo y loke a pasa den e temponan ey, el a remarca, tabata na su luga pa tin un crecemento, pero loke a pasa awor, el a agrega, ta cu a yega na un punto cu pa hopi aña a falta e decisionnan pa bisa cu ta ora pa tuma mas control di loke ta pasando den e industria. Cual ta un di e puntonan di atencion cu tambe a bin dilanti durante e reunion cu prome minister Eman.
“Nos a combersa con e gobierno actual nobo si ta buscando un manera pa wak con ta bay cambia e strategia den e industria y con ta bay cambia pa por tin un miho balansa pa proteha e comunidad, proteha e naturalesa y keda ainda cu un economia productivo,” el a enfatisa.
Strategia di turismo cu mester cambia pa tin mas enfoke riba calidad y no cantidad ta un di e puntonan cu mester di atencion y resolucion urgente cu ya caba AHATA a trece dilanti pa prome minister Eman, den su calidad di formador di gobierno, y pa co-formador Gerlien Croes. Den un declaracion anterior na Bon Dia Aruba LaSorte a remarca cu pa logra esaki lo mester di colaboracion di tur ministerio y e sector priva.
“E ta toca necesidad den infrastructura, por ehempel, educacion, incentiva pa inversion di renobacion, regulacion pa UTV y watersports, vacation rentals, etc. y mas,” el a indica.
Otro puntonan cu mester di atencion y resolucion urgente cu AHATA tambe a trece dilanti anteriormente durante su reunion cu formadornan Mike Eman y Gerlien Croes ta e necesidad di colaboracion pa yega na solucion hunto na bienestar di e comunidad y economia, y pa basa maneho riba dato y investigacion.
Necesidad di solucion pa escasez laboral tambe ta un punto di tencion cu AHATA ta trece dilanti, na varios ocasion. Solucion pa e problema aki, LaSorte a indica, ta necesario por mantene nivel halto di servicio y productividad.
Pa AHATA tambe ta importante pa tin educacion accesible y duna atencion na problemanan social y mental.
Un aparato gubernamental eficiente y productivo, y sigura cumplimento di impuesto pa tin “level playing field” tambe ta puntonan cu e organisacion a trece dilanti na varios ocasion.
Y por ultimo otro punto di atencion cu LaSorte ta subraya ta e esfuersonan di AHATA y su miembronan pa sigura cu compania y dunador di trabao tin maneho responsabel y ta apoya bienestar den comunidad.
