Dia 18 di mei ta conoci como Dia Internacional di Museo y en conexion cu e dia special aki, varios organisacion den e mundo di museo, arte y cultura na Aruba a uni cabes pa asina celebra e dia aki grandemente. Rayenne Hernandez, Specialista di Programa di Cultura pa Comision Nacional di UNESCO na Aruba, hunto cu directora di Fundacion Muchila Creativo, a elabora riba kico comunidad di Aruba por spera di e celebracion aki.
Hernandez a splica cu Dia Internacional di Museo ta un dia cu a ser declara na aña 1977 pa International Council of Museums pa promove y conscientisa comunidadnan rond di mundo tocante e importancia di museonan pa tanto cultura, educacion, ciencia, arte, entre otro. Dia 18 di mei tambe lo celebra esaki na Aruba den forma grandi.
El a indica cu e fecha aki ta ser celebra na otro partinan rond mundo pa varios aña caba y apenas awor na Aruba ultimo añanan a cuminsa pone atencion riba e dia importante aki.
Pa e motibo aki, el a remarca, cu riba e dia aki, hunto cu diferente partner y organisacion den Oranjestad a dicidi di cera cabes y organisa un celebracion grandi pa Dia Internacional di Museo. For di 10or di mainta te cu 3or di atardi ta bay tin varios actividad den diferente museo, galeria y instancianan di herencia na Aruba.
Pueblo por pasa bishita, entre otro, Museo Archeologico Nacional Aruba, Checkpoint Color, Biblioteca Nacional Aruba, Stichting Rancho, Archivo Nacional y Museo Historico Arubano cu lo tin exposicion, tayer y hopi mas pa publico disfruta di e Dia Internacional di Museo.
“Pasa cu henter famia pasobra tin hopi pa siña pa tur edad. Y museonan ta hunga un rol hopi importante den educacion di nos comunidad. Ban celebra, ban mustra mundo cu nos tambe sa con pa celebra Dia Internacional di Museo.
Directora di Fundacion Muchila Creativo, Rose-Marie Provence, a expresa cu pa e organisacion ta un gran honor pa por participa na e dia di museo e aña ki.
El a splica cu riba e dia aki Muchila Creativo lo tin un exposicion di cuadranan cu e studiantenan di Scol Muchila Creativo a traha pa nan examen. Pues lo expone esaki dia 18 di mei, e dia ey tambe lo bira e apertura oficial di exposicion y despues lo tin mas dia cu publico lo por pasa bishita e exposicion. Banda di esey nan lo tin diferente tayer di musica, teatro, baile y arte visual.
El a remarca cu pa haci e dia aki mas special y den cooperacion cu tur e partnernan, nan a pensa un manera con e comunidad por descubri y wak e balor di arte y cultura na Aruba. No solamente cu e publico ta djis drenta e luga wak rond lihe, pero pa nan siña tambe kico ta e arte y cultura di Aruba.
Asina nan a bin cu e idea pa e dia aki tambe nan organisa e ‘Dia di Museo Challange.’ Provance a splica cu na cada luga cu ta forma parti di e celebracion, publico por descubri palabranan specifico cu ta forma parti di un frase cu ta consisti di 10 palabra.
Aunke e actividad ta di 10or pa 3or di atardi y entre orario aki por ta dificil pa bishita tur museo, Provance a remarca cu lo ta bon pa publico bishita mas hopi luga posibel y asina colecta mas hopi palabra pa purba completa e frase di e ‘Dia di Museo Challange.’
Si un persona completa e frase di e ‘Dia di Museo Challange’ e tin te dia 6 di juni pa entrega esaki sea na Museo Archeologico Nacional Aruba of na Centro Muchila Creativo. Despues di dia 6 di juni ta menciona ken ta e ganador(nan) pa e Dia di Museo Challange.
“Nos ta spera cu publico lo acudi e dia ey grandemente y no djis bin wak, pero participa y descubri kico tur nos lo ofrece,” el a indica.
Contestando pregunta tocante e motibo pakico a scoge pa no envolve museonan di San Nicolas den e iniciativa aki, Marguerita Wever di Museo Archeologico Nacional Aruba a splica cu pa algun aña caba museo arkeologico, museo historico, Cas Tan Tin, y tin biaha e museonan na San Nicolas ta habri nan porta pa publico pa e celebracion aki, pero e ta keda na cada museo si ta haci esaki.
El a indica cu pa motibo cu a cera partnership cu Muchila Creativo, a bin na e idea pa envolve otro instancianan comunitario y cultural den area di playa cu por ta publico no ta spera cu tambe tin algo di ofrece di historia, arte, cultura, etc. y asina tambe a bin cu iniciativa pa enfoca riba e area di playa. Wever a enfatisa cu esey no kiermen cu e otro museonan no ta bay ta habri.
